لە چوارچێوەی چالاکییە هۆشیارییە کۆمەڵایەتییەکاندا، ڕۆژی سێشەممە، ڕێکەوتى (٢٥/١١/٢٠٢٥) گروپێک لە فێرخوازانى قۆناغی چوارەمی بەشی شیکاری کیمیایی پزیشکی لە زانکۆی جیهان-هەولێر، سەردانی قوتابخانەی ئامادەیی (بانەیی) کچانیان کرد.
سەردانەکە بە سەرپەرشتیی مامۆستای یاریدەدەر (هەوڕێ فاتیح سامی) ئەنجام درا و، لەلایەن مامۆستا بانە ڕەحمان بەڕێوەبەری قوتابخانەکە بە گەرمی پێشوازییان لێ کرا، پاشان فێرخوازان سیمینارێکیان بە ناونیشانی “تۆڕە کۆمەڵایەتییەکان و کاریگەرییان لەسەر ژیانی قوتابى” پێشکەش کرد، لەو چوارچێوەیەدا فێرخوازان باسیان لە پلاتفۆرمە کۆمەڵایەتییە جۆراوجۆرەکان کرد، هاوکات تیشکیان خستە سەر کاریگەرییان لەسەر ڕەفتاری فێرخوازان، تەندروستیی دەروونی، تەرکیزی خوێندن و کارلێکی کۆمەڵایەتی. لە بەشێکى دیکەى سمینارەکەیاندا فێرخوازان تیشکیان خستە سەر لایەنە ئەرێنییەکانی وەک پەرەپێدانی لێهاتووییە تەکنەلۆژییەکان، لە بەرامبەر لایەنە نەرێنییەکانی وەک (Cyberbullying)، ئالوودەبوون، پەرتەوازەبوونی سەرنج و بڵاوبوونەوەی زانیاریی ناڕاست، لە کۆتایشدا فێرخوازانى زانکۆى جیهان-هەولێر قوتابیانى قوتابخانەکەیان هاندا بەشێوەیەکى ژیرانە و بەرپرسانەی تۆڕە کۆمەڵایەتییەکان بەکاربهێنن.
سیمینارەکە بە شێوازێکی کارلێککاری بەڕێوەچوو و فێرخوازان بە پرسیار و سەرنجەکانیان بابەتەکەیان دەوڵەمەند کرد، لە کۆتاییدا، کارگێڕیی قوتابخانە ڕۆڵ و هەوڵی فێرخوازانی بەرز نرخاند لە بڵاوکردنەوەی هۆشیاری و جەختی لە گرنگیی ئەم چالاکییە پەروەردەییانە کردەوە بۆ بنیاتنانی نەوەیەکی هۆشیار و بەرپرس.
