گروپێک لە فێرخوازانی قۆناغی چوارەمی بەشی ئەندازياری پرۆگرامسازی وئينفۆرماتيك لە زانکۆی جیهان-هەولێر، ڕۆژی یەکشەممە (١٥ی شوباتی ٢٠٢٦)، سەردانێکی زانستییان بۆ قوتابخانەی جیهانی نێودەوڵەتی ئەنجامدا.

ئەم چالاکییە بە سەرپەرشتی مامۆستای یاریدەدەر (دوعا حەیدەر مستەفا) و بە بەشداری فێرخوازان (یاسمین ئەحمەد، دانیا ئوسامە و نوروڵا فەخری) بەڕێوەچوو، لە میانی سیمینارەکەیاندا، فێرخوازانی زانکۆ بابەتێکی تەکنیکی و وردیان دەربارەی پاراستنی ئاسایشی دیجیتاڵی و چۆنییەتی ناسینەوەی هەوڵەکانی هاککردن و دزەپێکردنی زانیارییەکان لە ناو تۆڕە کۆمەڵایەتییەکاندا پێشکەش کرد. هەروەها، تیشکیان خستە سەر ئەو مەترسییانەی کە ڕەنگە ڕووبەڕووی بەکارهێنەران ببێتەوە و ڕێگاکانى کەمکردنەوەی ئەو مەترسییانە و پاراستنی نهێنییە کەسییەکان بۆ قوتابیان ڕوون کرایەوە. هەر لە سیمینارەکەدا جەختی لەسەر بەرزکردنەوەی ئاستی هۆشیاری دیجیتاڵی و نیشاندانی باشترین پەیڕەوەکان کردەوە بۆ ئەوەی قوتابیان بتوانن بە شێوەیەکی ئەرێنی و سوودبەخش ئەم پلاتفۆرمە تەکنەلۆژییانە لە ژیانی ڕۆژانەیاندا بەکاربهێنن.

ئەم چالاکییە کاردانەوەیەکی زۆری لای قوتابیانی قوتابخانەکە دروست کرد و بە پەرۆشییەوە بەشدارییان لە گفتوگۆکاندا کرد، کە ئەمەش نیشانەی گرنگیی بابەتەکە بوو بۆ ژیانی ڕۆژانەیان. لە پەراوێزی سەردانەکەدا، شاندی فێرخوازانی زانکۆ لەگەڵ هەریەک لە مامۆستایان (نازار عبد الستار عبدالرحمن و شيا عمر محمد) کۆبوونەوە و بیروڕای زانستی و پەروەردەییان دەربارەی چۆنییەتی پەرەپێدانی توانای قوتابیان ئاڵوگۆڕ کرد.

بە سەرپەرشتی سەرۆکایەتی بەش، گرووپێک لە فێرخوازانی قۆناغی سێیەم و چوارەمی بەشی بایۆمیدیکاڵ لە زانکۆی جیهان-هەولێر، بەشدارییەکی کارایان لە یەکەمین ڕۆژی “یەکەمین فیستیڤاڵی ڕەمەزان” لە بازاڕی شەقامی هەولێر کرد.

لەو فیستیڤاڵەدا، کە ڕۆژی دووشەممە ڕێکەوتى (٢٣ی شوباتی ٢٠٢٦) بە فەرمی کرایەوە. لە مەراسیمی کردنەوەی فیستیڤاڵەکەدا بە ئامادەبوونی پڕۆفیسۆر دکتۆر ئەمجەد سابر دەلۆ سەرۆکی زانکۆی جیهان-هەولێر و، دکتۆر نەوزاد یەحیا باجگر سەرۆکی دەستەی ئەمیندارێتی زانکۆکانی جیهان و ئومێد خۆشناو پارێزگاری هەولێر بەڕێوەچوو، فێرخوازانى بەشى بایۆمیدیکاڵ چەند چالاکیەکى جۆراوجۆریان ئەنجامدا.

لە میانی چالاکییەکەدا، فێرخوازانى زانکۆى جیهان-هەولێر هەڵمەتێکی پشکنینی تەندروستیی بێبەرامبەریان بۆ سەردانیکەرانی فیستیڤاڵەکە ئەنجامدا، کە تێیدا پشکنینی ڕێژەی شەکرە لە خوێن، پێوانەکردنی پەستانی خوێن، دیاریکردنی گرووپی خوێن و هەژمارکردنی بارستایی جەستە (BMI) بۆ هاوڵاتیانیان ئەنجامدا پاشانیش .ئەنجامی پشکنینەکانیان بۆ بەشداربووان شیکردەوە و کۆمەڵێک ڕێنمایی تەندروستییان دەربارەی “ڕۆژووی سەلامەت” پێشکەش کردن، لەگەڵ جەختکردنەوە لەسەر چۆنیەتی پاراستنی باری تەندروستی لە مانگی ڕەمەزانی پیرۆزدا، ئەمەش کاریگەرییەکی ئەرێنی لەسەر بەرزکردنەوەی ئاستی هۆشیاریی تەندروستیی گشتی لە شاری هەولێر دەبێت.

فیستیڤاڵەکە لە ٢٣ی شوبات تاوەکو ١٩ی ئازاری ٢٠٢٦ بەردەوام دەبێت. بە ئامانجی ڕەخساندنی دەرفەتی کار بۆ بازرگانان و دروستکردنی کەشێکی خێزانییە بۆ مانگی ڕەمەزان.

ڕۆژی سێشەممە ڕێکەوتی (٢٨ی نیسانی ٢٠٢٦)، فێرخواز (ناز منزر موزەفەر) لە قۆناغی چوارەمی بەشی بایۆمیدیکاڵ لە زانکۆی جیهان-هەولێر، سەردانێکی زانستی و پەروەردەیی بۆ قوتابخانەی جیهان ئەنجامدا.

لەم سەردانەدا، ئەو فێرخوازە سیمینارێکی سەرنجڕاکێشی بە ناونیشانی خولیاکان (Hobbies) پێشکەش کرد، کە تێیدا تیشکی خستە سەر ڕۆڵی گرنگی ئارەزووە کەسییەکان لە بەهێزکردنی تواناکانی مرۆڤ و باشترکردنی باری دەروونی و جەستەیی قوتابیان.

لە کاتی گەیشتنیاندا، فێرخوازەکەى زانکۆى جیهان-هەولێر لەلایەن (مەحمود عیماد) بەڕێوەبەری گشتیی قوتابخانەی جیهان بە گەرمی پێشوازییان لێکرا، کە تێیدا دەستخۆشی لەم جۆرە دەستپێشخەرییە ئەکادیمییانە کرد بۆ پەرەپێدانی ئاستی ڕۆشنبیریی قوتابیان. پاشان لە هۆڵی قوتابخانە و بە ئامادەبوونی قوتابیانی پۆلی یازدەیەم و دوازدەیەم ناوەڕۆکى سیمینارەکەى پێشکەش کرد؛ بۆ ئەوەش سەرەتا فێرخواز ناز منزر بە وردی ڕوونی کردەوە کە چۆن پەیڕەوکردنی خولیاکان دەبێتە هۆی پەرپێدانی داهێنان، کەمکردنەوەی فشاری دەروونی و باشترکردنی تەندروستیی مێشک، بەتایبەت بۆ ئەو قوتابیانەی لە ژینگەیەکی

ئەکادیمیی چڕدا دەخوێنن. بەشێکى دیکەى چالاکییەکە بە شێوەیەکی کارلێکەر بەڕێوەچوو، کە تێیدا قوتابیان بە پەرۆشییەوە بەشدارییان لە گفتوگۆکاندا کرد و ڕا و سەرنجی خۆیان دەربارەی خولیا جیاوازەکان ئاڵوگۆڕ کرد.

لە کۆتایی چالاکیەکەدا، بەڕێوەبەری گشتیی قوتابخانە سوپاسی فێرخواز ناز منزری کرد بۆ ئەو زانیارییە بەنرخانەی پێشکەشی کردن و، جەختی کردەوە کە دابینکردنی هاوسەنگی لە نێوان خوێندن و ئارەزووە کەسییەکان کلیلی سەرکەوتنی گەنجانە لە داهاتوودا.