بە سەرپەرشتی سەرۆکایەتی بەش، گرووپێک لە فێرخوازانی قۆناغی سێیەم و چوارەمی بەشی بایۆمیدیکاڵ لە زانکۆی جیهان-هەولێر، بەشدارییەکی کارایان لە یەکەمین ڕۆژی “یەکەمین فیستیڤاڵی ڕەمەزان” لە بازاڕی شەقامی هەولێر کرد.
لەو فیستیڤاڵەدا، کە ڕۆژی دووشەممە ڕێکەوتى (٢٣ی شوباتی ٢٠٢٦) بە فەرمی کرایەوە. لە مەراسیمی کردنەوەی فیستیڤاڵەکەدا بە ئامادەبوونی پڕۆفیسۆر دکتۆر ئەمجەد سابر دەلۆ سەرۆکی زانکۆی جیهان-هەولێر و، دکتۆر نەوزاد یەحیا باجگر سەرۆکی دەستەی ئەمیندارێتی زانکۆکانی جیهان و ئومێد خۆشناو پارێزگاری هەولێر بەڕێوەچوو، فێرخوازانى بەشى بایۆمیدیکاڵ چەند چالاکیەکى جۆراوجۆریان ئەنجامدا.
لە میانی چالاکییەکەدا، فێرخوازانى زانکۆى جیهان-هەولێر هەڵمەتێکی پشکنینی تەندروستیی بێبەرامبەریان بۆ سەردانیکەرانی فیستیڤاڵەکە ئەنجامدا، کە تێیدا پشکنینی ڕێژەی شەکرە لە خوێن، پێوانەکردنی پەستانی خوێن، دیاریکردنی گرووپی خوێن و هەژمارکردنی بارستایی جەستە (BMI) بۆ هاوڵاتیانیان ئەنجامدا پاشانیش .ئەنجامی پشکنینەکانیان بۆ بەشداربووان شیکردەوە و کۆمەڵێک ڕێنمایی تەندروستییان دەربارەی “ڕۆژووی سەلامەت” پێشکەش کردن، لەگەڵ جەختکردنەوە لەسەر چۆنیەتی پاراستنی باری تەندروستی لە مانگی ڕەمەزانی پیرۆزدا، ئەمەش کاریگەرییەکی ئەرێنی لەسەر بەرزکردنەوەی ئاستی هۆشیاریی تەندروستیی گشتی لە شاری هەولێر دەبێت.
فیستیڤاڵەکە لە ٢٣ی شوبات تاوەکو ١٩ی ئازاری ٢٠٢٦ بەردەوام دەبێت. بە ئامانجی ڕەخساندنی دەرفەتی کار بۆ بازرگانان و دروستکردنی کەشێکی خێزانییە بۆ مانگی ڕەمەزان.
ڕۆژی سێشەممە ڕێکەوتی (٢٨ی نیسانی ٢٠٢٦)، فێرخواز (ناز منزر موزەفەر) لە قۆناغی چوارەمی بەشی بایۆمیدیکاڵ لە زانکۆی جیهان-هەولێر، سەردانێکی زانستی و پەروەردەیی بۆ قوتابخانەی جیهان ئەنجامدا.
لەم سەردانەدا، ئەو فێرخوازە سیمینارێکی سەرنجڕاکێشی بە ناونیشانی خولیاکان (Hobbies) پێشکەش کرد، کە تێیدا تیشکی خستە سەر ڕۆڵی گرنگی ئارەزووە کەسییەکان لە بەهێزکردنی تواناکانی مرۆڤ و باشترکردنی باری دەروونی و جەستەیی قوتابیان.
لە کاتی گەیشتنیاندا، فێرخوازەکەى زانکۆى جیهان-هەولێر لەلایەن (مەحمود عیماد) بەڕێوەبەری گشتیی قوتابخانەی جیهان بە گەرمی پێشوازییان لێکرا، کە تێیدا دەستخۆشی لەم جۆرە دەستپێشخەرییە ئەکادیمییانە کرد بۆ پەرەپێدانی ئاستی ڕۆشنبیریی قوتابیان. پاشان لە هۆڵی قوتابخانە و بە ئامادەبوونی قوتابیانی پۆلی یازدەیەم و دوازدەیەم ناوەڕۆکى سیمینارەکەى پێشکەش کرد؛ بۆ ئەوەش سەرەتا فێرخواز ناز منزر بە وردی ڕوونی کردەوە کە چۆن پەیڕەوکردنی خولیاکان دەبێتە هۆی پەرپێدانی داهێنان، کەمکردنەوەی فشاری دەروونی و باشترکردنی تەندروستیی مێشک، بەتایبەت بۆ ئەو قوتابیانەی لە ژینگەیەکی
ئەکادیمیی چڕدا دەخوێنن. بەشێکى دیکەى چالاکییەکە بە شێوەیەکی کارلێکەر بەڕێوەچوو، کە تێیدا قوتابیان بە پەرۆشییەوە بەشدارییان لە گفتوگۆکاندا کرد و ڕا و سەرنجی خۆیان دەربارەی خولیا جیاوازەکان ئاڵوگۆڕ کرد.
لە کۆتایی چالاکیەکەدا، بەڕێوەبەری گشتیی قوتابخانە سوپاسی فێرخواز ناز منزری کرد بۆ ئەو زانیارییە بەنرخانەی پێشکەشی کردن و، جەختی کردەوە کە دابینکردنی هاوسەنگی لە نێوان خوێندن و ئارەزووە کەسییەکان کلیلی سەرکەوتنی گەنجانە لە داهاتوودا.
ڕۆژی یەکشەممە ڕێکەوتی (١٥ی ئازاری ٢٠٢٦)، گروپێک لە فێرخوازانی قۆناغی سێیەم و چوارەمی بەشی بایۆمیدیکاڵ لە زانکۆی جیهان-هەولێر، چالاکییەکی بەرفراوانی هۆشیاریی تەندروستی و پشکنینی پزیشکیی بێبەرامبەریان بۆ هاوڵاتیان لە ناوەندی بازرگانی (گڕاند ماجیدی مۆڵ) ئەنجامدا.
ئەم دەستپێشخەرییە بە سەرپەرشتی سەرۆکایەتی بەش بەڕێوەچوو، لە میانی ئەم چالاکییەدا، فێرخوازانی زانکۆ کۆمەڵێک ڕێنمایی زانستییان دەربارەی شێوازە دروستەکانی بەربانگکردنەوە و چۆنیەتی گواستنەوەی سیستەمی خۆراک بۆ دۆخی ئاسایی لە دوای مانگی ڕەمەزان و ڕۆژانی جەژنی قوربان پێشکەش بە هاوڵاتیان کرد. هاوکات، فێرخوازان بە شێوەیەکی مەیدانی چەندین پشکنینی سەرەتاییان وەک: پێوانەکردنی پەستانی خوێن، ڕێژەی شەکرە لە خوێن و دیاریکردنی گرووپی خوێن بۆ ئامادەبووان ئەنجامدا و لەسەر بنەمای ئەنجامی پشکنینەکان، شیکردنەوەی پزیشکی و ڕێنمایی پێویستیان بۆ پاراستنی باری تەندروستییان پێ بەخشین.
هەر لە ناو چوارچێوەی ئەم هەڵمەتەدا، فێرخوازان هەماهەنگییان لەگەڵ “تاقیگەی فلۆریا بۆ دەستنیشانکردنی نەخۆشییەکان” کرد، کە تێیدا تاقیگەکە پاڵپشتیی چالاکییەکەی کرد لەرێگەی دابینکردنی پشکنینی بێبەرامبەری وەک (CBC و Lipid Profile) و، بڕی ٥٠٪ داشکاندن بۆ چەندین پشکنینی تاقیگەیی دیکە بۆ ئەو هاوڵاتیانەی سەردانی ستاندی زانکۆیان کردبوو.
لە هەنگاوێکی مرۆیی و ئەخلاقیدا، گروپێک لە فێرخوازانی قۆناغی سێیەمی بەشی بایۆمیدیکاڵ لە زانکۆی جیهان-هەولێر، ڕۆژی پێنجشەممە ڕێکەوتی (١٩ی شوباتی ٢٠٢٦)، سەردانێکی مەیدانییان بۆ نەخۆشخانەی نانەکەلی بۆ نەخۆشییەکانی خوێن و شێرپەنجە ئەنجامدا.
ئەم چالاکییە کە بە سەرپەرشتی مامۆستای یاریدەدەر (هێرۆ ئیسماعیل محەمەد) بەڕێوەچوو، لە کاتی گەیشتنیاندا، شاندی زانکۆ لەلایەن (کرمانج محەمەد عومەر) بەڕێوەبەری کارگێڕی نەخۆشخانە پێشوازییان لێکرا. پاشان فێرخوازان بەشە جیاوازەکانی نەخۆشخانەکەیان بەسەرکردەوە، لەوانە: هۆڵەکانی مانەوەی منداڵان، تاقیگەکان و یەکەی وەرگرتنی خوێن، کە تێیدا لە نزیکەوە لەگەڵ منداڵە نەخۆشەکان و کادرانی پزیشکی کۆبوونەوە. دواتریش فێرخوازانی زانکۆ چەندین دیارییان بەسەر منداڵاندا دابەش کرد و بە ڕوحێکی مرۆیی و هاندەرەوە گفتوگۆیان لەگەڵ کردن، بە مەبەستی گەیاندنی دڵنیایی و گەڕانەوەى خەندە بۆ سەر لێوی منداڵەکان و بەرزکردنەوەی ورەیان لە کاتی وەرگرتنی چارەسەرە قورسەکاندا.
بەڕێوەبەری کارگێڕی نەخۆشخانەی نانەکەلی دەستخۆشی لەم دەستپێشخەرییەی فێرخوازانی زانکۆی جیهان-هەولێر کرد و ڕۆڵی ئەرێنی ئەوانی لە پێشکەشکردنی پاڵپشتی دەروونی بۆ منداڵان بەرز نرخاند. هاوکات، کەسوکاری منداڵە تووشبووەکان سوپاس و پێزانینی خۆیان ئاراستەی فێرخوازانی بەشەکە کرد بۆ ئەم ئاوڕدانەوە مرۆییە کە کاریگەرییەکی ئەرێنی لەسەر باری دەروونی نەخۆش و خێزانەکانیان دروست کرد.
گروپێک لە فێرخوازانی قۆناغی سێیەمی بەشی بایۆمیدیکاڵ لە زانکۆی جیهان-هەولێر، ڕۆژی سێشەممە ڕێکەوتى (١٧ی شوباتی ٢٠٢٦)، هەڵمەتێکی هۆشیاریی تەندروستییان بە بۆنەی نزیکبوونەوەی مانگی ڕەمەزانی پیرۆز لە پارکی پێشمەرگە ئەنجامدا.
ئەم هەڵمەتە بە سەرپەرشتی سەرۆکایەتی بەش بەڕێوەچوو، لە میانی کەمپینەکەدا، فێرخوازانی زانکۆ برۆشوور و بڵاوکراوەی زانستییان بەسەر خێزان و سەردانیکەرانی پارکەکەدا دابەش کرد، کە چەندین ڕێنمایی پراکتیکیی بۆ پاراستنی باری تەندروستی لە مانگی ڕەمەزاندا لەخۆ گرتبوو. هاوکات تیشک خرایە سەر گرنگیی پلاندانانی دروست بۆ ژەمەکانی پاشێو و بەربانگ بە مەبەستی پاراستنی ئاستی وزەی جەستە لە کاتژمێرەکانی ڕۆژوودا، هەروەها ڕوونکردنەوەی پێویست درا دەربارەی جۆری ئەو خۆراکانەی کە یارمەتیدەرن لە پشتگیریکردنی تەندروستی گشتی و کەمکردنەوەی هەستی تینوێتی و ماندووبوون.
ئەم چالاکییە کارلێکێکی ڕاستەوخۆی لەگەڵ هاوڵاتیان، بەتایبەت ژنان و منداڵان، بەدوای خۆیدا هێنا، کە تێیدا فێرخوازان وەڵامی پرسیارەکانی ئامادەبووانیان دەربارەی هاوسەنگیی توخمە خۆراکییەکان دایەوە و جەختیان لەوە کردەوە کە ڕۆژووی تەندروست لەسەر بنەمای میانڕەوی لە بڕی خواردن و جۆراوجۆریی پێکهاتەکان بونیاد دەنرێت.
بە دروشمی “بەیەکەوە ئومێد دەچێنین”، ژمارەیەک لە فێرخوازانی بەشی بایۆمیدیکاڵ لە زانکۆی جیهان-هەولێر، ڕۆژی پێنجشەممە ڕێکەوتى (١٢/٢/٢٠٢٦)، سیمینارێکی هۆشیارییان لە قوتابخانەی “هەولێر ٢”ی سیستمی ئینگلیزی ئەنجامدا.
شاندی فێرخوازان لەلایەن خاتوو (سافان تاڵب حوسێن) بەڕێوەبەری قوتابخانەکەوە بە گەرمی پێشوازییان لێکرا و دەستخۆشی لەم جۆرە دەستپێشخەرییە زانستییانە کرا بۆ بەرزکردنەوەی ئاستی تەندروستی قوتابیان، پاشان فێرخوازان سیمینارەکەیان لە هۆڵی قوتابخانە پێشکەشى قوتابیانی قۆناغی ١١ و ١٢ کرد، کە تێیدا فێرخوازانی زانکۆ بابەتێکی زانستی وردیان دەربارەی نەخۆشی شێرپەنجە پێشکەش کرد. تەوەرەکان بریتی بوون لە ناساندنی جۆرەکانی شێرپەنجە، میکانیزمی گەشەکردنی لە ناو جەستەدا، ڕێگەکانی دەستنیشانکردن و نوێترین بژاردەکانی چارەسەر. ئامانجی سەرەکی چالاکییەکە، چەسپاندنی کولتووری خۆپارێزی و گرنگیی پشکنینی پێشوەختە بوو لای نەوەی نوێ.
لە بڕگەیەکی کۆتایی چالاکییەکەدا، فێرخوازان چەندین دیاریی ڕەمزییان بەسەر ئامادەبوواندا دابەش کرد، لە کۆتاییدا بەڕێوەبەری قوتابخانە سوپاسی فێرخوازانى زانکۆی جیهان-هەولێری کرد بۆ ئەم هەوڵە مەیدانییە و فێرخوازانیش لای خۆیانەوە سوپاسی هاوکاری و پێشوازیی گەرمی کارگێڕی قوتابخانەکەیان کرد.
گروپێک لە فێرخوازانی بەشی بایۆمیدیکاڵ لە زانکۆی جیهان-هەولێر، ڕۆژی سێشەممە ڕێکەوتی (١٠ی شوباتی ٢٠٢٦)، هەڵمەتێکی تەندروستییان بە دروشمی “چۆن بە تەندروستییەکی باشتر بژین” بۆ ئەندامانی سەنتەری خانەنشینانی هەولێر ئەنجامدا.
ئەم چالاکییە بە سەرپەرشتی مامۆستای یاریدەدەر (هێرۆ ئیسماعیل محەمەد) بەڕێوەچوو، بۆ ئەوەش سەرەتا فێرخوازان لەلایەن (یوونس عوسمان خدر) بەڕێوەبەری سەنتەرەکەوە پێشوازییەکی گەرمیان لێکرا، دواتر بەرنامەى هەڵمەتەکەیان دەستپێکرد، کە پێکهاتبوو لە پێشکەشکردنی چەندین ئامۆژگاری و ڕێنمایی تەندروستی و، جەختیان لەسەر شێوازی ژیانی تەندروست دەکردەوە. فێرخوازان ڕوونکردنەوەی پێویستیان پێشکەش بە بە خانەنشینان کرد، کە تایبەت بوون بە گرنگیدان بە خواردنی میوە و سەوزە، ئەنجامدانی چالاکی جەستەیی ڕۆژانە و کەمکردنەوەی خوێ و شەکر لە ژەمە خۆراکییەکاندا بۆ پاراستنی جەستە لە نەخۆشییە درێژخایەنەکان. ئەم بەشەی چالاکییەکە بە گفتوگۆ و ئاڵوگۆڕی زانیاری لە نێوان فێرخوازان و خانەنشینان کۆتایی هات.
جگە لە لایەنە هۆشیارییەکە، فێرخوازان چەندین پشکنینی پزیشکیی خێرایان بۆ ئامادەبووان ئەنجامدا، کە پشکنینی ڕێژەی شەکرە لە خوێن، پێوانەکردنی پەستانی خوێن و هەژمارکردنی بارستایی جەستە (BMI)ی لەخۆ گرتبوو. ئەندامانی سەنتەری خانەنشینان دەستخۆشییان لە ڕەفتاری پیشەیی و لێهاتوویی فێرخوازانی زانکۆی جیهان کرد و جەختیان لەوە کردەوە کە ئەم جۆرە چالاکییانە کاریگەرییەکی ئەرێنی زۆریان لەسەر دۆخی دەروونی و جەستەیی ئەوان هەیە.
کۆمەڵێک لە فێرخوازانی بەشی بایۆمیدیکاڵ، ڕۆژی چوارشەممە ڕێکەوتی (٤/٢/ ٢٠٢٦)، سەردانى ئامادەیی ساڤای ناحکومی (خوێندنى ئینگلیزی) کرد و سیمینارێکی زانستییان بە ناونیشانی “هۆرمۆنە مێینەکان و ڕۆڵیان لە تەندروستی جەستەیی و دەروونیدا” پێشکەش بە قوتابیانى قوتابخانەکە کرد.
ئەم چالاکییە بەسەرپەرشتی خاتوو (نەزا حامید محەمەد عەلی) بەڕێوەچو، بەگەیشتنیان لە لایەن خاتوو (هانا سەلام حوسێن) یاریدەدەری بەڕێوەبەری قوتابخانە، پێشوازییەکی گەرمیان لێکرا. پاشان چالاکییەکە لە هۆڵی قوتابخانە و بە ئامادەبوونی قوتابیانی قۆناغی دوازدەیەمی ئامادەیی ئەنجامدرا. لە میانی سیمینارەکەدا، فێرخوازانی بایۆمیدیکاڵ تیشکیان خستە سەر گرنگیی هۆرمۆنە مێینەکان و کاریگەرییان لەسەر تەندروستی ئافرەت، لەوانە هۆرمۆنەکانی (ئیسترۆجین، پرۆجێسترۆن، FSH، LH، ئۆکسیتۆسین و پڕۆلاکتین).
فێرخوازان بە وردی باسیان لە ڕۆڵ و ئەرکە فیسیۆلۆژییەکانی ئەم هۆرمۆنانە کرد؛ ڕوونیان کردەوە کە هۆرمۆنی “ئیسترۆجین” کە بە شێوەیەکی سەرەکی لە هێلکەدانەکاندا بەرهەم دێت، هۆرمۆنی سەرەکیی مێینەیە و بەرپرسە لە گەشەی ئەندامەکان و ڕێکخستنی سووڕی مانگانە. هەروەها ئاماژەیان بەوە کرد کە هۆرمۆنی “پرۆجێسترۆن” دوای پرۆسەی هێلکەدانان دەردەدرێت و ڕۆڵێکی گرنگی هەیە لە ئامادەکردنی جەستە بۆ دووگیانی و پشتگیریکردنی تەندروستی زاوزێ.
لە کۆتایی سیمینارەکەدا، چەند چالاکییەکی کارلێککارانە ئەنجامدرا کە تێیدا چەند پرسیارێکی سادە دەربارەی بابەتەکە ئاراستەی فێرخوازانى زانکۆى جیهان-هەولێر کرا بە مەبەستی بەهێزکردنی تێگەیشتنە زانستییەکانیان. لای خۆیەوە خاتوو هانا سەلام حوسێن دەستخۆشی لە سەرۆکایەتی بەش و فێرخوازانی بەشداربوو کرد بۆ هەوڵەکانیان لە پێشکەشکردنی سیمینارێکی زانستیی ڕێکخراو کە بابەتێکی گرنگ و پەیوەست بە کۆمەڵگەی تێدا تاووتوێ کرا.
ڕۆژی پێنجشەممە، ڕێکەوتى (2026/1/15)، بەسەرپەرشتی مامۆستای یاریدەدەر (بەختەوەر زیاد عومەر)، کۆمەڵێک لە فێرخوازانی قۆناغی سێیەمی بەشی بایۆمیدیکاڵ لە زانکۆی جیهان–هەولێر، چالاکیەکى زانستی و هۆشیارییان دەربارەی “فریاگوزاری سەرەتایی” لە قوتابخانەی ئەمین زەکی بنەڕەتی تێکەڵاو لە شاری هەولێر بەڕێوەبرد.
سەرەتا فێرخوازان لە لایەن خاتوو (ڤیان مجید ڕەمەزان) بەڕێوەبەری قوتابخانە، پێشوازییەکی گەرمیان لێکرا، پاشان لە کتێبخانەی قوتابخانەکەدا، فێرخوازان وانەیەکی فێرکارییان پێشکەشى منداڵان کرد، کە تێیدا تیشکیان خستە سەر پرەنسیپە بنەڕەتییەکانی فریاگوزاری سەرەتایی، بەتایبەت چۆنیەتی مامەڵەکردن لەگەڵ حاڵەتە کتوپڕەکانی وەک “سووتان، برینداری و پێکان”. فێرخوازان بە شێوەیەکی کردەیی ڕێکارە دروستەکانیان بۆ منداڵەکان ڕوون کردەوە تا بزانن لە کاتی ڕووداوەکاندا چۆن بە شێوەیەکی دروست ڕەفتار بکەن.
لە کۆتایی چالاکییەکەدا، فێرخوازانی زانکۆ دیارییان بەسەر منداڵاندا دابەش کرد. لە بەرانبەردا بەڕێوەبەری قوتابخانە دەستخۆشی لە فێرخوازان کرد بۆ ئەم دەسپێشخەرییە و ڕۆڵیان لە بەرزکردنەوەی ئاستی هۆشیاری تەندروستی منداڵان.
کۆلیژا پەرستاری ل زانکۆیا جیهان-دهۆک بەردەوامە ل سەر پێشکێشکرنا خولا خۆ یا زانستی ل ژێر ناڤ و نیشانێن “هۆشیاریا تەندروستی و ساخلەمیا جڤاکی”، سمینارەکا دی یا بها ژلایێ مۆامۆستا (م. زیاد جمیل) ڤە هاتە پێشکێشکرن ل دۆر (ڤاکسینان و رۆلێ وان د بەرهەنگاربوونا نەخۆشیان دا)، ب مەرەما بلندکرنا ئاستێ هۆشیاریا ساخلەمی و زانستی د ناڤبەرا قوتابیان دا، و بهێزکرنا شیانێن وان یێن پەرستاری و پێشڤەبرنا لایەنێ وان یێ (پراکتیکی).
