لە چوارچێوەی کاری خۆبەخشی دەزگای زەکاتی زانست لە زانکۆی جیهان سلێمانی، زانکۆی جیهان-سلێمانی بە هاوکاری “سەنتەری پەرەپێدانی کار (CDC)”، پڕۆگرامی ژیریی دەستکرد بۆ پراکتیزی خوێندنی باڵا وەک خولێکی ڕاهێنانی پێشکەوتوو بۆ مامۆستایان و ستافی ئەکادیمی زانکۆ دەستپێدەکات. ئەم خولە تایبەتە لەناو تاقیگەی AI Lab لە زانکۆی جیهان-سلێمانی بەڕێوەدەچێت و بۆ ماوەی پێنج ڕۆژ بەردەوام دەبێت، کە تێیدا ڕۆژانە یەک کاتژمێر وانە پێشکەش بە بەشداربووان دەکرێت. خولەکە لەلایەن هەردوو پسپۆڕ، م. شێرکۆ موراد و د. پشێو نووری دەوترێتەوە و ئامانجی سەرەکی ئاشناکردنی مامۆستایانە بە ناساندنی بنەماکانی ژیریی دەستکرد لە توێژینەوەی زانستی، بەرزکردنەوەی کارایی وانەوتنەوە و داڕشتنی سیستەمی نوێی هەڵسەنگاندن لە بواری ئەکادیمیدا.

لە چوارچێوەی کاری خۆبەخشی دەزگای زەکاتی زانست لە زانکۆی جیهان سلێمانی، خولی زمانی ئینگلیزی بە هەماهەنگی سەنتەری گەشەپێدانی کار (CDC) لە زانکۆی جیهان-سلێمانی و ڕێکخراوی N2N بەڕێوەدەچێت، کە ئامانج لێی بەرزکردنەوەی ئاستی توانای قسەکردن و بەکارهێنانی زمانەکەیە لە ژینگەی پیشەیی و ژیانی ڕۆژانەدا.
ئەم خولە کە لە ڕێکەوتی 15ی تەممووزی 2026ەوە دەستی پێکردووە و ئێستا بەردەوامە، جەخت لەسەر لایەنە کردارییەکانی زمان و بەکارهێنانی لە شوێنی کاردا دەکاتەوە، نەک تەنها لەبەرکردنی وشە و بەکارهێنانی شێوازی ڕێزمانی.

فێرخوازانی بەشی بایۆمیدیکاڵ بەشدارییان لە کۆنفرانسی ڕۆژی جیهانیی نەخۆشیی شەکرەدا کرد، کە لەلایەن ڕێکخراوی تەندروستیی ئاشتی بە هەماهەنگی لەگەڵ بەڕێوەبەرایەتیی تەندروستیی هەولێر ڕێکخرابوو.

چالاکییەکە ڕۆژی دووشەممە، ڕێکەوتی ٢٤/١١/٢٠٢٥، لە هۆتێل ڕادیسۆن لە شاری هەولێر بەڕێوەچوو و، بە وتەی (ئومێد خۆشناو) پارێزگاری هەولێر دەستی پێ کرد و، تێیدا جەختی لە گرنگیی بەرزکردنەوەی هۆشیاری دەربارەی نەخۆشیی شەکرە و ڕۆڵی ڕۆشنبیری تەندروستی لە سنووردارکردنی بڵاوبوونەوەی لە کۆمەڵگەدا کردەوە.

هاوکات لە چوارچێوەى بەرنامەى کۆنفرانسەکە ژمارەیەک قسەکەری دیار وتەیان پێشکەش کرد؛ لەوانە دکتۆر (عومەر سۆرچی) بابەتێکی دەربارەی گۆڕانکارییە فیسیۆلۆژییەکان لە جەستەی نەخۆشدا بەهۆی شەکرەوە پێشکەش کرد و، تیشکی خستە سەر ئەو ئاڵنگارییانەی نەخۆش ڕووبەڕوویان دەبێتەوە، هەروەها هەریەک لە دکتۆرە (ئیسرا عومەر)، دکتۆرە (شنە بەگزادە) و دکتۆر (نەوشاد نەوزاد) باسیان لە نوێترین پێشهاتەکان لە ئامێرەکانی دەستنیشانکردن، ستراتیژییەکانی خۆپاراستن و چارەسەرە مۆدێرنەکان کرد، کە یارمەتیدەرن بۆ کۆنترۆڵکردنی نەخۆشییەکە و ڕێگریکردن لە لێکەوتەکانی.

لە کۆنفرانسەکەدا، فێرخوازانی بایۆمیدیکاڵ بە شێوەیەکی کارا بەشدارییان لە دانیشتنەکاندا کرد لە ڕێگەی ئاڕاستەکردنی پرسیاری زانستی، هەروەها بەشدارییان لە ڕێکخستنی چالاکییەکەدا کرد. ئەمەش دەرفەتێکی گرنگ بوو بۆیان تا ئاگاداری دوایین پێشهاتە پزیشکییەکان بن و، ئەزموونی کردەیی لە مامەڵەکردن لەگەڵ پسپۆڕانی کەرتی تەندروستی پەیدا بکەن.