لە ڕۆژی چوارشەممە ڕێكەوتی (25/11/2025)و، بە بۆنەی ڕۆژی جیهانیی بەرەنگاربوونەوەی توندوتیژی دژی ئافرەتان، دوو فێرخوازی بەشی پەروەردەی گشتی/ زمانی ئینگلیزی لە زانکۆی جیهان – هەولێر، بە ناوەکانی (ئیسرا کێفی) و (هوناز کەریم)، سەردانی قوتابخانەی ڕوساکیان کرد بە مەبەستی پێشکەشکردنی سیمینارێکی هۆشیاری دەربارەی توندوتیژی و دەستدرێژی دژی ئافرەتان.
سەرەتا فێرخوازان لەلایەن مامۆستا شیراز ئەحمەد حەمەدەمین بەڕێوەبەری قوتابخانە و مامۆستا بێریڤان نووری مەجید، پێشوازییەکی گەرمیان لێکرا و دەستخۆشییان لەم دەستپێشخەرییە گرنگە کرد. پاشان فێرخوازان سیمینارێکەیان پێشکەش کرد، کە تێیدا بابەتە سەرەکییەکانی توندوتیژی دژی ئافرەتانیان خستەڕوو. تەوەرەکانی سیمینارەکە بریتی بوون لە شیکردنەوەی شێوازە جیاوازەکانی دەستدرێژی، لەوانە دەستدرێژیی جەستەیی، زارەکی و ئەلیکترۆنی، لەگەڵ تیشک خستنە سەر کاریگەرییە دەروونی و کۆمەڵایەتییەکانی ئەم ڕەفتارانە لەسەر ئافرەتان. هەروەها لایەنی یاسایی بابەتەکە ڕوونکرایەوە، بەتایبەت ماددەی ٤٣٠ کە سزاکانی هەڕەشە و دەستدرێژی دیاری دەکات، بە جەختکردنەوە لەسەر گرنگیی ڕاگەیاندنی ڕووداوەکان و بەڵگەکردنیان. هەروەها فێرخوازان جەخت لەسەر ڕۆڵی پەروەردە، هۆشیاریی خێزان و پشتیوانیی کۆمەڵگە کرایەوە لە پاراستنی مافی ئافرەتان.
لە کۆتاییدا، کارگێڕیی قوتابخانەکە سوپاسی زانکۆی جیهان – هەولێریان کرد بۆ پشتیوانیکردنی ئەم جۆرە چالاکییە ئامانجدارانە، کە دەبنە هۆی بەرزکردنەوەی هۆشیاری و چەسپاندنی کەلتووری ڕێزگرتن.
