لە چوارچێوەی هەوڵە هاوبەشەکان بۆ بەرزکردنەوەی ئاستی زانستی و پیشەیی، بە هاوبەشی لە نێوان بەشی یاسای زانکۆی جیهان -سلێمانى، دەزگای زەکاتی زانست، و بەڕێوەبەرایەتی ئاڕاستەکردن و ڕابەریکردنی مەعنەوی-سلێمانی، سیمینارێک لەژێر ناونیشانی “چۆنیەتی نووسینەوەی توێژینەوەی زانستی” بۆ ٨٠ ئەفسەر و کارمەندی سەر بە بەڕێوەبەرایەتییەکانی وەزارەتی ناوخۆ لە سلێمانی، لە هۆڵی سیمینارەکانی زانکۆ ئەنجام درا.
لە سەرەتای سیمینارەکەدا، بەڕێز پ.ی.د. سادات عبدالله عزیز، یاریدەدەری سەرۆکی زانکۆ، وتەیەکی پێشکەش کرد و وێڕای بەخێرهێنانی گەرمی ئامادەبووان، سوپاسی بەشی یاسای کرد بۆ هەوڵە بەردەوامەکانیان لەپێناو خزمەتکردنی کۆمەڵگە و دامەزراوە فەرمییەکاندا.
پاشان، لەلایەن سەرۆکى بەشی ئاڕاستەکردن و ڕابەریکردنى مەعنەوى سلێمانى، لە وتەیەکدا سوپاس و پێزانینی خۆی ئاڕاستەی سەرۆکایەتی زانکۆ، بەشی یاسا، و دەزگای زەکاتی زانستى کرد بۆ ڕێکخستنی ئەم چالاکییە گرنگە، کە بە هەنگاوێکی بنەڕەتی دانا بۆ پەرەپێدانی تواناکانی ئەفسەران.
جێگەی ئاماژەیە کە سیمینارەکە لەلایەن هەردوو بەڕێز، د. ئاسۆ حەمەشین عبدالکریم، سەرۆکی بەشی یاسا، و پ.ی.د. نوری حەمەسەعید، بەڕێوەبەری دەزگای زەکاتی زانست، پێشکەش کرا و تێیدا تیشک خرایە سەر بنەما و ڕێکارە زانستییەکانی توێژینەوەى زانستى.
