لە چوارچێوەی کاری خۆبەخشی دەزگای زەکاتی زانست لە زانکۆی جیهان سلێمانی، لە ڕێکەوتی ٢ی ئەیلولی ٢٠٢٦، پ.د. کەریم شەریف قەرەچەتانی، بەڕێوەبەری سەنتەری ڕاوێژکاری دەروونی و کۆمەڵایەتی لە زانکۆی جیهان – سلێمانی، لە کۆشکی هونەر بەشداری لە ئیڤێنتی «تالێنت کریێتەرز» کرد.
ئەم ئیڤێنتە لەلایەن دامەزراوەی «تالێنت هەب» و بە چاودێریی بەڕێوەبەرایەتیی گشتیی پەروەردەی سلێمانی، بە هاوبەشی لەگەڵ دەزگای میدیایی کوردسات، بە مەبەستی پاڵپشتی و پەرەپێدانی تواناکانی گەنجانی داهێنەر بەڕێوەچوو.
لە چوارچێوەی ئەم ئیڤێنتەدا، پ.د. کەریم شەریف قەرەچەتانی بابەتی «بیرکردنەوەی داهێنەرانە و خەسڵەتەکانی کەسی داهێنەر»ی پێشکەش کرد. لەو پێشکەشکردنەدا، گرنگیی بیرکردنەوەی داهێنەرانە و ڕۆڵی لە پەرەپێدانی تواناکانی کەسی و کۆمەڵایەتیی گەنجان خستەڕوو، هەروەها باس لە خەسڵەت و تایبەتمەندییەکانی کەسی داهێنەر و شێوازەکانی گەشەپێدانی توانای داهێنان کرا.
ئەم بەشدارییە هەنگاوێکی گرنگ بوو بۆ بەهێزکردنی کەلتووری داهێنان و هاندانی گەنجان بۆ بیرکردنەوەی نوێ، دروستکردنی بیرۆکەی داهێنەرانە و بەکارهێنانی توانستە کەسییەکانیان بۆ دۆزینەوەی چارەسەری نوێ و کاریگەر.
