ە ڕۆژی چوارشەممە، ڕێکەوتى (١٣/١١/٢٠٢٤) گروپێک لە فێرخوازانى کۆلێژی پزیشکی ددان لە زانکۆى جیهان-هەولێر سەردانی خانەی منداڵە بێ سەرپەرشتەکانی لە شارى هەولێر کرد بۆ پێشکەشکردنی چاودێرێکردنى گشتی ددان و خزمەتگوزاری تەندروستی.
لە میانەى ئەو سەردانەدا، کە بە سەرپەرشتی مامۆستای یاریدەدەر (ساوێن تەحسین تەها)، مامۆستای یاریدەدەر (باهۆز هیمداد مجید) و مامۆستای یاریدەدەر (مریەم فاخر ئیبراهیم) بەڕێوەچوو، گروپێک لە فێرخوازانى قۆناغی سێیەم کۆلێژى پزیشکی ددان پشکنینی ددانیان بەخۆڕایی بۆ منداڵانى ئەنجامدا و دەستنیشانى حاڵەتەکانی تەندروستی دەم و ددان ئەنجامدا، هەروەک چارەسەری پێویستیان پێشکەش بە منداڵەکان کرد، جگە لەوەش تیمەکە پشکنینی شەکری خوێنیان ئەنجامدا.
هەروەک لە پەراوێزى چالاکیە خۆبەخشیە پزیشکیەکە و، بۆ زیاتر گەشاوەکردنی ڕۆژەکە، هەر منداڵێک دیارییەکی تایبەتی پێدرا، ئەوەش بووە مایەى خۆشحاڵى منداڵانى خانەکە و، بەڕێوەبەرى خانەکەش سوپاسى فێرخوازان و مامۆستایانى سەرپەرشتیارى کرد.
ڕۆژى پێنچ شەممە ڕێکەوتى (١٤/١١/٢٠٢٤) فێرخوازانى قۆناغی سێیەمی کۆلێژی پزیشکی ددان لە زانکۆى جیهان-هەولێر سەردانى ماڵى بەساڵاچووانیان لە شارى هەولێر کرد و، چالاکیەکى پزیشکى و کۆمەڵایەتى خۆبەخشیان ئەنجامدا.
لە میانەى ئەو چالاکیەدا، کە بە سەرپەرشتی مامۆستای یاریدەدەر (ساوێن تەحسین طه)، مامۆستای یاریدەدەر(باهۆز هیمداد مەجید) و، مامۆستای یاریدەدەر(مریەم فاخر ئیبراهیم) بەڕێوەچوو، فێرخوازانى کۆلێژى پزیشکى ددان کۆمەڵێک کەلوپەل و پێداویستى تایبەتیان پێشکەش بە ماڵى بەساڵاچوان کرد و، پشکنینی ددانیان و پشکنینی شەکره و پەستانی خوێنیان بۆ بە ساڵاچووان ئەنجامدان لە بەرانبەردا بەساڵاچووان سوپاسى فێرخوازانیان کرد.
ئامانجی دەستپێشخەرییەکە پشتگیریکردنی بەساڵاچووان بوو لەڕێگەی دابینکردنى پێداویستییە سەرەکیەکان و چارەسەرکردنى لایەنى تەندروستی گشتى و تەندروستى ددانیان بەتایبەت، جگە لەوەش تێکەڵکردنی کارامەیی پیشەیی لەگەڵ بەرپرسیارێتی کۆمەڵایەتی و، پەروەردەکردنی ڕۆحی خۆبەخشى و هاوسۆزی لەگەڵ چین و توێژە جیاکان.
لە بەردەوامى چالاکیەکیانیان و بۆ بڵاوکردنەوەى هۆشیارى تەندروستى، ڕۆژی پێنجشەممە ڕێکەوتى (٢٠/٢/٢٠٢٥) فێرخوازانى قۆناغی دووەمی کۆلێژی پزیشکی ددان لە زانکۆى جیهان-هەولێر، بە سەرپەرشتی مامۆستایانى یاریدەدەر ساوێن تەحسین تەها و مریەم فاخیر ئیبراهیم و غفران موسلیم عەقیل سەرداني قوتابخانەی تایبەتی شیاو یان کرد و چالاکیەکیان ئەنجامدا.
لە سەرەتادا، فێرخوازان لەلایەن مامۆستا ڕەفعەت حەسەن بەڕێوەبەرى قوتابخانەکە پێشوازییان لێکرا، پاشان لە وتەیەکدا بەخێرهاتنى فێرخوازانى زانکۆى جیهان-هەولێرى کرد و، ستایشی هەوڵەکانییانى کرد بۆ پێشکەشکردنی زانیاری پزیشکی بە شێوەیەکی سەرنجڕاکێش بە قوتابیانى قوتابخانەکەیان، دواتر گروپێک لە فێرخوازان سیمینارێکی زانستیان پێشکەش بە قوتابیانى قوتابخانەی شیاوی ئەهلی کرد، لە میانەى سمینارەکەیاندا فێرخوازانى زانکۆى جیهان-هەولێر باس لە گرنگی گرنگیدان بە تەندروستی دەم و ددان و باشترین پراکتیزەکان بۆ پاراستنی ددانەکان کرد. هەر لە میانەى سمینارەکەیاندا فێرخوازانى پزیشکی ددان ڕوونکردنەوەیەکی وردیان لەسەر ئەو خووە تەندروستانە خستەڕوو کە ددانەکان لە خراپبوون و نەخۆشی پووک دەپارێزن، وەک جۆرى فڵچە وهەڵبژاردنی ئەو خۆراکانەی کە سوودیان بۆ تەندروستی دەم و ددان هەیە، هەروەها گرنگی سەردانی پزیشکی ددان بەشێوەیەکى بەردەوام بۆ دەستنیشانکردنی هەر کێشەیەکی تەندروستی، سمینارەکە بە سروشتی کارلێککەری هەبوو، چونکە فێرخوازان شێوازی پەروەردەیی مۆدێرنیان بەکارهێنا، لەوانەش نمایش و مۆدێلی پزیشکی کە یارمەتیدەر بوون لە سادەکردنی زانیارییەکان..
لەکۆتایی سمینارەکەدا قوتابیانى قوتابخانەکە کۆمەڵێک پرسیاریان لەبارەى ڕێگەباشەکان بۆ پاراستنى ددانیان لە فێرخوازان کرد، فێرخوازانیش دواى وەڵامدانەوەى پرسیارەکان کۆمەڵێک بروشورى پەروەردەیی و دیاری ڕەمزی، وەک فڵچە و مەعجونی ددانیان بەسەر قوتابیان دابەشکرد.
لە چوارچێوەى هەوڵە بەردەوامەکانى بەشی پەروەردەی گشتی لە زانکۆی جیهان – هەولێر بۆ کۆمەک و هاوکاریکردنى ئەو چین و توێژە جیایانەى کۆمەڵگە کە پێویستیان بە پاڵپشتیکردنە، ڕۆژى یەکشەممە ڕێکەوتى (19ی 1ی 2025)، بەسەرپەرشتی دکتۆر احمد عەبدلعون سەرۆکى بەشى پەروەردەى گشتى و، ئەندامێتی مامۆستاى یاریدەدەر بۆتان عثمان ئەمین و ژمارەیەک لە فێرخوازانى قۆناغی دووەم سەردانى ماڵى بەساڵاچوانیان لە شارى هەولێر کرد.
مامۆستاى سەرپەرشتیار و فێرخوازان دواى ئەوەى بەگەرمى لەلایەن سەنگەر جەمال عەبدولکەریم بەڕێوەبەرى ماڵى بەساڵاچوان و کۆمەڵێک فەرمانبەر پێشوازییان لێکرا، ئینجا کۆمەڵێک دیارییان بەسەر (٦٥) ژن و پیاوى بەساڵاچوى ماڵەکەدا دابەش کرد، کە بریتیبوون لە جانتا و جل و بەرگ و پێداویستییە کەسییەکانیان. لە بەرانبەردا بەڕێوەبەری ماڵەکە دڵخۆشی و پێزانینی خۆی بۆ ئەم هەڵوێستە مرۆییەی فێرخوازان و ستافى مامۆستایانى پەروەردەى گشتى دەربڕی، هیواشى خواست بەردەوامى بە کارە مرۆییەکانیان بدەن، چونکە بەساڵاچوان پێویستیان بەوەیە لە هەموو ڕویەکەوە چاودێرى بکرێن.
دکتۆر ئەحمەد عەبدولعەون سەرۆکى بەشی پەروەردەی گشتی، ڕایگەیاند: یەکێک لە ئەرکە گرنگەکانمان بریتیە لە دروستکردنى پەیوەندى لە نێوان فێرخوازان و کۆمەڵگە، بۆ ئەو مەبەستەش دەخوازین لە ڕێگەى ئەو جۆرە چالاکیانەوە ڕۆحی هاوکاری و پاڵپشتى کۆمەڵایەتی لە نێوان فێرخوازان بەهێز بکەین و، بەها مرۆییەکان لەنێوانیاندا بڵاو بکەینەوە، چۆنکە دەرچوانمان دەبنە سەرکردەی داهاتوو و ڕۆڵیان لە پێگەیاندنى نەوەکان دەبێ بەتایبەت لە بوارى پەروەردەى لە ناوەندەکانى خوێندن.
بەشی پەروەردەی گشتی لە زانکۆى جیهان-هەولێر لە بەردەوامى پڕۆژە خێرخوازییەکانیدا لە مانگى پیرۆزى ڕەمەزاندا بڕە پارەیەکی بۆ جلوبەرگی جەژن بەسەر خێزانی منداڵانی بێ باوک دابەش کرد.
ڕۆژى دووشەممە ڕێکەوتى (٨/٤/٢٠٢٤) دکتۆر ئەحمەد عەبد عون سەرۆکى بەشى پەروەردەى گشتى بە هاوکاری دەزگای زێرین بۆ سەرپەرشتى منداڵە بێ باوک، لە مزگەوتى جودەت ئەسعەدى هاوکارییەکەى بەسەر خێزانەکاندا دابەش کرد. لەو چالاکیەدا، کە بەئامادەبونى کەنعان سیساوەیی سەرۆکى دەزگای زێرین بۆ سەرپەرشتى منداڵە بێ باوک بەڕێوەچوو بڕى پێنچ سەد هەزار دینارى بەسەر پێنج خێزانی منداڵی هەتیودا دابەش کرد
ئەم بڕە پارەیە پێشتر جاسم فاخر فێرخوازى قۆناغى سێیەمى بەشى پەروەردەى گشتى لە فێرخوازان و مامۆستایان و هەندێک هاوکاری دەرەوەی زانکۆ کۆکرایەوە، لە پێناو چەسپاندنی بەها کۆمەڵایەتییەکان و کاری خێرخوازی و پاراستنی پەیوەندی لەگەڵ کۆمەڵگەی ناوخۆییدایە.
فێرخوازانى بەشی تەکنیکى سڕکردن لە زانکۆی جیهان-هەولێر ڕۆژى چوارشەممە ڕێکەوتى (١٩/٢/٢٠٢٥) سەردانێکی مرۆیی بۆ ماڵى بێ سەرپەرشتان لە شارى هەولێر ئەنجامدا و، هاوکاریان بەسەر منداڵانى ماڵەکەدا دابەش کرد.
لەو چالاکیە مرۆییەدا، کە بەسەرپەرشتى مامۆستاى یاریدەدەر شذى ناصح بەڕێوەچوو، سەرەتا مامۆستا و فێرخوازان لەلایەن شێروان عەبدولڕەحمان بەڕێوەبەرى ماڵەکە پێشوازییان لێکرا، لە وتەیەکدا دواى بەخێرهێنانیان بە گرنگیەوە باسى لەو دەستپێشخەرییە کرد و، بە پاڵپشتیەکى دەروونی و کۆمەڵایەتی گرنگى بۆ منداڵان لەقەڵەمدا، چونکە کاریگەریی ئەرێنی لەسەر باری دەروونی منداڵان دروست دەکات، لە بەشێکى دیکەى سەردانەکەیاندا کە ژمارەیەک مامۆستاى دیکەى بەشى تەکنیکى سڕکردن هاوەڵى فێرخوازانیان دەکرد، کۆمەڵێک دیاریی کە بە پاڵپشتی سەرۆکی بەش ئامادەیان کردبوو بەسەر منداڵانى ماڵەکەدا دابەشیان کرد و، خەندە و دڵخۆشی خستە دڵی منداڵەکان.
چالاکیە جگە لەوەى ژینگەیەکى خۆشى بۆ منداڵان دروستکرد، لەهەمانکاتدا بووە وێستگەیەکى گرنگ بۆ کارلێککردنی ڕاستەوخۆی فێرخوازان لەگەڵ منداڵە بێ سەرپەرشتەکان، هەر ئەوەش بووە هۆکارێک بۆ بەرزکردنەوەى ئاستى هۆشیاری و کۆمەڵایەتیی فێرخوازان و، زیاتر هەستکردن بە بەرپرسیارێتی کۆمەڵایەتی.
ڕۆژی چوارشەممە ڕێکەوتى (5/2/2025) بەسەرپەرشتی (مامۆستاى یاریدەدەر محمد محمد حسێن)، فێرخوازانی بەشی نیوتریشن و دایەتێتیکس لە زانکۆی جیهان – هەولێر سەردانى قوتابخانەى سەربەستیان لە شارى هەولێر کرد و، سیمینارێکیان بەناونیشانی کاریگەری خواردنی ناتەندروست و خواردنی خێرا لەسەر خوێندن پێشکەش بە قوتابیانى پۆلی هەشتەمی قوتابخانەکە کرد.
لەگەڵ گەیشتنیان، فێرخوازان لەلایەن محەمەد سورگوڵی بەڕێوەبەری قوتابخانەکە بە گەرمی پێشوازییان لێکرا، پاشان لە هۆڵى قوتابخانەکە، فێرخوازانى زانکۆى جیهان-هەولێر سمینارەکەیان پێشکەش بە قوتابیانى پۆلى هەشتەم کرد و، تیایدا ئەوەیان ڕوونکردەوە کە چۆن زیادەڕۆیی لە خواردن بەتایبەت خواردنی خێرا و خۆراکی ناتەندروست دەتوانێت کاریگەری نەرێنی لەسەر تەرکیز و ئاستی وزە و ئەدای خوێندنی گشتی هەبێت، بۆ ئەوەش تیشکیان خستە سەر مەترسییە تەندروستییەکانی پەیوەست بەم خووانە، وەک قەڵەوی و کەمی ماددە خۆراکیەکان و تێکچوونی گۆڕانکاری خۆراک، هاوکات جەختیان لەسەر گرنگی پەیڕەوکردنی خۆراکی هاوسەنگ کردەوە بۆ بەرزکردنەوەی ئەرکەکانی مەعریفی و باشترکردنی کارایی فێربوون.
سیمینارەکە هۆشیارییەکی بەنرخی پێشکەش بە قوتابیانى قوتابیخانەکە کرد بەتایبەت لەسەر گرنگی وەرگرتنی هەڵبژاردنی خۆراکی تەندروست بۆ پشتگیریکردن لە ئەدای ئەکادیمی و تەندروستی گشتییان.
ڕۆژی پێنجشەممە ڕێکەوتى (٦/٢/٢٠٢٥) بەسەرپەرشتی (مامۆستاى یاریدەدەر محمد محمد حسێن)، گروپێک لە فێرخوازانى قۆناغی چوارەم لە بەشی نیوتریشن و دایەتێتیکس لە زانکۆی جیهان – هەولێر سیمینارێکیان لە ئامادەیی هەولێرى کچان پێشکەش بە قوتابیانی پۆلی دوانزەی ئامادەییەکە کرد.
فێرخوازان دواى ئەوەى لەلایەن مامۆستا تریفە محەمەد سەرپەرشتیاری قوتابخانە پێشوازییەکی گەرمیان لێکرا، ئینجا دەرفەتیان بۆ ڕەخساندن و لە هۆڵى قوتابخانەکە سمینارێکیان بەناونیشانی “کاریگەریی جۆرە جیاوازەکانی خۆراک لەسەر فێربوون و پەروەردە” پێشکەش بە قوتابیانى پۆلى دوانزەى قوتابخانەکە کرد، بۆ ئەو مەبەستەش هەریەک لە فێرخوازان فاتیمە ئازاد، زەینەب ئەحسان و ڤیدیاس محەمەد پێکەوە باسیان لە ڕۆڵی خۆراک لە باشترکردنی کارکردنی مێشک و زیادکردنی تەرکیز و بەرزکردنەوەی بیرەوەری و ئەدای خوێندنی گشتی کرد.
لە بەشێکى دیکەى سمینارەکەیاندا، فێرخوازانی زانکۆ بەوردى باسیان لە کاریگەری خواردنی خۆراکی بەسوود کرد، بۆ ئەو مەبەستەش تیشکیان خستە سەر گرنگی ئەو خۆراکە هاوسەنگانەى، کە دەوڵەمەندن بە ڤیتامین و کانزا و ماددە خۆراکییە پێویستەکان، هەر بۆ ئەو مەبەستەش جەختیان لەسەر ڕۆڵی گرنگی کاتی ژەمەکان و کاریگەری زیادەڕۆیی لە خواردنی شەکر و کافاین لەسەر توانا مەعریفیەکان کردەوە. سمینارەکە بە کارلێککردنى فێرخوازانی قوتابخانەکە و بەخستنەڕوى سەرەنج و پرسیارەکانیان، کە پەیوەندییان بە خووی خواردنی تەندروستەوە هەبوو زیاتر دەوڵەمەند کرا.
ڕۆژى یەک شەممە ڕێکەوتى (٩/٢/٢٠٢٥) بە سەرپەرشتی مامۆستای یاریدەدەر محەمەد محەمەد حسێن، کۆمەڵێک لە قوتابیانی قۆناغی چوارەم لە بەشی نیوتریشن و دایەتێتیکس لە زانکۆی جیهان-هەولێر سیمینارێکیان لە قوتابخانەی کوردستانی ئایندەی ئەهلی پێشکەش کرد. سیمینارەکە بەناونیشانی “کاریگەری کەمی ڤیتامین D لەسەر تەندروستی” بوو.
فێرخوازان دواى ئەوەى لەلایەن مامۆستا زانا احمد به گه ڕم و گوڕى پێشوازییان لێکرا، پاشان فێرخوازان لە هۆڵى قوتابخانەکەدا سمینارەکەیان پێشکەش بە قوتابیانی پۆلی 12 کرد، لە میانی سیمینارەکەدا فێرخواز باسیان لە ڕۆڵی سەرەکی ڤیتامین D کرد لە تەندروستی ئێسک و کارکردنی سیستمی بەرگری لەش و تەندروستی دەروونیدا، هەروەک ئەوەشیان ڕوون کردەوە کە چۆن کەمی ڤیتامین D دەتوانێت ببێتە هۆی حاڵەتەکانی وەکو ڕیکێت لە منداڵان، پووکانەوەی ئێسک لە گەورەکاندا و، زیادبوونی مەترسی تووشبوون و نەخۆشی درێژخایەن. هەر لە میانەى لە پێشکەشکردنەکەدا تیشکیان خستە سەر سەرچاوە سروشتییەکانی ڤیتامین دی، لەوانە بەرکەوتن بە تیشکی خۆر، سەرچاوە خۆراکیەکانی وەک ماسی و بەرهەمە شیرەمەنیەکان، هەروەها بەکارهێنانی تەواوکەری خۆراک لەکاتی پێویستدا.
دانیشتنەکە کارلێککارانە بوو، چونکە ڕێگە بە قوتابیانى ئامادەیی دا پرسیارەکانیان سەبارەت بە خۆراک و خووەکانییان و شێوازی ژیانیان کە پەیوەندییان بە وەرگرتنی ڤیتامین Dەوە هەیە بکەن و وەڵامى پێویست بەدەست بهێنن.
ڕۆژی سێشەممە ڕێکەوتى (١١/٢/٢٠٢٥) بە سەرپەرشتی مامۆستاى یاریدەدەر محمد محمد حسێن، هەریەک لە (ناز ئەحمەد و فیدیاس ئەحمەد) فێرخوازانى قۆناغی سێیەم لە بەشی نیوتریشن و دایەتێتیکس لە زانکۆی جیهان – هەولێر سیمینارێکی هۆشیارییان لە قوتابخانەی ئیشک بەناونیشانی (کاریگەری خواردنی شەکر لەسەر تەندروستی مرۆڤ) پێشکەش کرد.
لەگەڵ گەیشتنیان فێرخوازان لەلایەن محمد احمد سەرپەرشتیاری قوتابخانە پێشوازییەکی گەرمیان لێکرا، پاشان ناوەڕۆکى سمینارەکەیان پێشکەش بە قوتابیانى قوتابخانەکە کرد، بۆ ئەو مەبەستەش ناز ئەحمەد ڕوونیکردەوە زیادەڕۆیی لە خواردنی شەکر هۆکارێکى سەرەکى قەڵەویە، هاوکات دەبێتە هۆى خراپبوونی ددانەکان و کەمبوونەوەی ئاستی وزە، پاشان تیشکی خستە سەر کاریگەری خواردنەوە شەکردارەکان و خۆراکە پرۆسێس کراوەکان لەسەر ئاستى تەرکیز و باری دەروونی و ئەدای خوێندنی گشتی، لەبەر ڕۆشنایی ئەو ڕاستیانە جەخت لەسەر گرنگی کەمکردنەوەی شەکری زیادکراو لە خۆراک و هەڵبژاردنی خواردنێکى جێگرەوەى تەندروستى کردەوە، وەک شیرینی سروشتی و میوەی تەواو، هەروەها ئامۆژگاری پراکتیکی پێشکەش کرد سەبارەت بە چۆنیەتی ناسینەوەی شەکری شاراوە لە خۆراکە پاکەتکراوەکان .
هەروەها لە چوارچێوەی سیمینارەکەدا، فێرخوازان دەرفەتیان بۆ ڕەخسا کە پێوەرەکانی بارستەی جەستەیان (BMI) بپێون بۆ هەڵسەنگاندنی دۆخی کێشیان بە بەراورد بە باڵایان، بۆ ئەو مەبەستەش ناز ئەحمەد ڕێنمایی قوتابیانى کرد لە ڕێگەی پرۆسەی هەژمارکردنى BMI، باڵا و کێشیان تۆمار کرد، پاشان هاوکێشەی BMI (کێش بە کیلۆ دابەشکراو بەسەر چوارگۆشەی باڵا بە مەتر) بەکارهێنا بۆ ئەوەی بزانن ئایا لە پۆلی ئاساییدان، کەم کێش، کێشی زیادە، یان قەڵەون. هەروەها ڕوونیکردەوە کە چۆن BMI تەنها نیشاندەرێکی گشتی تەندروستییە، بەڵام هۆکارەکانی دیکەی وەک بارستەی ماسولکەکان و ئاستی چالاکییەکان و شێوازی ژیانی گشتی لەبەرچاو ناگرێت، بەو شێوەیەش کۆتایی بە چالاکیەکە هات.
