پەروەردەیی

ڕۆژی چوارشەممە ڕێکەوتى (29ی 1ی 2025)، ژمارەیەک لە فێرخوازانى قۆناغی سێیەمی بەشی بایۆمیدیکاڵ، سەردانى قوتابخانەى ئامادەیی  سەردەمیان لە شارى هەولێر کرد و سمینارێکى  زانستییان بەناونیشانی “ئەکزیما: نەخۆشی و خۆپاراستن” پێشکەش بە قوتابیانى قوتابخانەکە کرد.

چالاکیەکە، بەسەرپەرشتی مامۆستاى یاریدەدەر بەختەوەر زیاد عومەر بەڕێوەچوو، کە فێرخوازان دواى ئەوەى لەلایەن مامۆستا عەلى جەبار بەڕێوەبەری قوتابخانەکە  بە گەرمی پێشوازییان لێکرا،  سوپاسى فێرخوازنى کرد بۆ ئەم دەستپێشخەرییە، کە ئامانج لێی بڵاوکردنەوەی هۆشیارى تەندروستییە.

پاشان لە هۆڵى قوتابخانەکە، بە ئامادەبوونی قوتابیانی پۆلی دەیەم ؛ فێرخوازانى زانکۆى جیهان-هەولێر ناوەڕۆکى سمینارەکەیان پێشکەشکرد، بۆ ئەوەش سەرەتا ڕوونکردنەوەیەکی وردیان لەسەر ئەکزیما پێشکەش بە قوتابیان کرد، کە تیایدا دواى ناساندنى ئەکزیما، ئینجا باسیان لە هۆکارەکان و دەرکەوتن و نیشانەکانی پەیوەست بەو حاڵەتە کرد، ئینجا تیشکیان خستە سەر نوێترین ڕێگەکانی دەستنیشانکردن و چارەسەرکردن و تەنانەت خۆپاراستن لە نەخۆشییەکەش. بۆ ئەو مەبەستەش فێرخوازانى زانکۆى جیهان-هەولێر کۆمەڵێک ئامۆژگاریان پێشکە بە قوتابیان کرد بۆ چۆنیەتى خۆپاراستن و کەمکردنەوەی مەترسی تووشبوون بە ئەکزیما.

لە کۆتایی سیمنارەکەیاندا، فێرخوازان بڕوانامەی ڕێزلێنانیان پێشکەش بە مامۆستا عەلی جبار بەڕێوەبەرى قوتابخانەکە کرد و، بەناوی سەرۆکى بەشی بایۆمیدیکاڵ سوپاسى ڕەخساندنى ئەو دەرفەتەیان کرد.

ڕۆژی سێشەممە ڕێکەوتى (٢٦/١١/٢٠٢٤)، فێرخوازانی قۆناغی دووەمی بەشی بایۆمێدیکاڵ سەردانی ئامادەیی شایستەی کچانیان  لە شاری هەولێر کردب و بابەتێکیان بەناونیشانی “هۆشیاری و خۆپاراستن لە ڤایرۆسی ئایدز” پێشکەش بە قوتابیانى  پۆلی دە و یانزە کرد.

فێرخوازان لەلایەن مامۆستا( فەرەح فەوزی احمد) بەڕێوەبەری قوتابخانەی ئامادەیی شایستە بەگەرمی پێشوازییان لێکرا، پاشان لە هۆڵى قوتابخانەکە سیمینارێکیان پێشکەش بە قوتابیانى پۆلى  ١٠ و ١١ قوتابخانەکە کرد. لە میانی سیمینارەکەدا، فێرخوازانی بایۆمێدیکاڵ زانیاری وردیان سەبارەت بە نەخۆشی و ڤایرۆسی ئایدز پێشکەش کرد، لەوانەش هۆکارەکان و چۆنیەتی توشبوون، گواستنەوە، خۆپاراستن و چارەسەرکردنی لە کاتی توشبوون. ئامانجی چالاکیەکە بەرزکردنەوەی ئاستی هۆشیاری و بەهێزکردنی فێرخوازانی ئامادەییەکە بوو لە چۆنیەتی خۆپارێزی و رێگری کردن لە توشبوون.

وەک ئاماژەیەک بۆ پێزانین بۆ پاڵپشتی و میواندارییەکەی، فێرخوازان بەناوی بەشەوە سوپاسنامەیەکی فەرمییان پێشکەش بە مامۆستا فەرەح فەوزی احمد کرد. هەروەها پۆستەرێک دەربارەی نەخۆشی ئایدز کە لەلایەن فێرخوازانەوە ئامادەکرابوو پێشکەش بە قوتابخانەکە کرا. لە بەرانبەردا بەڕێوەبەری قوتابخانە سوپاس و پێزانینی خۆی دەربڕی و دەستخۆشی لە فێرخوازان کرد بۆ هەوڵەکانیان لە هۆشیارکردنەوە وگەیاندنی زانیاری وورد بۆ فێرخوازانی قوتابخانەکە.

رۆژی چوارشەمە ڕێکەوتى (٦/١١/٢٠٢٤) گروپێک لە فێرخوازانی بەشی بایۆمێدیکاڵ لە زانکۆى جیهان-هەولێر سەردانی ئامادەیی نانەکەلی کچانیان کرد لە شارى هەولێر کرد و بابەتێکى تەندروستیان بە ناونیشانی (تێگەیشتن لە زیادبوونی کێشی پەیوەست بە ستیرۆیدەکان و کاریگەریە لاوەکیەکانی) پێشکەش بە قوتابیانى قوتابخانەکە کرد.

فێرخوازانی قۆناغی دووەمی بەشی بایۆمێدیکاڵ، کە بە سەرپەرشتی مامۆستای یاریدەدەر ( بەختەوەر زیاد عمر) سەردانى قوتابخانەکەیان کرد بوو، دوای پێشوازیکردنیان لەلایەن مامۆستا (سەوزە طلعت زیوەر) بەرێوبەری قوتابخانەى ئامادەیی نانەکەلی، ئینجا لە هۆڵی قوتابخانەکەبە ئامادەبوونی مامۆستایان و قوتابیان باسیان لە زیادبوونی کێشی پەیوەست بە ستیرۆیدەکان و کاریگەریە لاوەکیەکان پێشکەش بە قوتابیان کرد، بۆ ئەوەش باسیان لە لایەنە جیاکان و هۆکارەکانى زیادبوونى کێش کرد، هاوکات ڕێنمایی قوتابیان کرد، کە هەندێ جار زیاد بوونی کێشە بە هۆی وەرگرتنی چارەسەرە بۆ نەخۆشیە جیاکان، ئەوەش لە ئەنجامى  هەستیاری و دۆخی تەندروستی.

دوای پێشکەشکردنی سیمینارەکە؛ فێرخوازانی بەشی بایۆمێدیکاڵ بە نوێنەرایەتی بەش سوپاس و پێزانینی سەرۆکایەتی بەش و زانکۆیان پێشکەش بە بەرێوبەری قوتابخانە مامۆستا (سەوزە طلعت زیوەر) کرد، لە بەرانبەردا ئەویش سوپاس و دەست خۆشی لە فێرخوازان کرد و، خۆش حاڵی خۆیانی دەربری بەرامبەر سەرکەوتووی و توانای فێرخوازانی بەشی بایۆمێدیکاڵ.

لە بەردەوامى چالاکیە زانستیى و هۆشیارییەکانى فێرخوازانى بەشى بایۆمیدیکاڵ لە زانکۆى جیهان-هەولێر، رۆژی دوو شەمە رێکەوتی (٤/١١/٢٠٢٤) لە میانەى سەردانێکیاندا بۆ (قوتابخانەی مصطفی شعبانی بنەرەتی) لە شارى هەولێر چالاکیەکیان بە ناونیشانی (گرنگیەکانی دەست شوشتن و شێوازەکانی خۆپاراستن) پێشکەش بە قوتابیانى قوتابخانەکە کرد.

فێرخوازانى قۆناغی سێیەمی بەشی بایۆمێدیکاڵ دواى ئەوەى لە لایەن مامۆستا (سامان شاکر قادر) بەرێوبەری قوتابخانەکە پێشوازیەکی گەرمیان لێکرا، ئەنجا لە هۆڵی کۆبوونەوەکانی قوتابخانە لەگەڵ قوتابیان کۆبونەوە و چالاکیەکەیان پێشکەش کرد  و، تێدا بەوردى باسیان لە گرنگیەکانی دەست شوشتن و شێوازەکانی خۆپارێزی لە نەخۆشی و زیندەوەرەکان کرد، هەروەها باسیان لە چۆنیەتی بڵاوبوونەوەی زیندەوەرەکان بە تایبەت بەکتریا و ڤایرۆسەکان بە شێوازی پراکتیکی بۆ قوتابیانى قوتابخانەکە شیکردەوە.

هەر لە میانەی چالاکیەکەیاندا فێرخوازانى بەشى بایۆمیدیکاڵ مادەی پاکەرەوەیان پێشکەش بە قوتابیانى قوتابخانەکە کرد، لەگەڵ ئەوەشدا تابلۆیەک کە لە لایەن (هوما خدر سعید) فێرخوازى بەشى بایۆمیدیکاڵ وێنە کرابوو و، تایبەت بوو بە شیکردنەوەى گرنگی دەست شوشتن و خۆپارێزی لە نەخۆشە گوازراوەکان؛ پێشکەش بە قوتابخانەکە کرا.

لە بەرانبەردا ماموستا (سامان شاکر قادر) و مامۆستایانی قوتابخانەکە دوای دەست خۆشی و سوپاس کردنی فێرخوازەکانی بەشی بایۆمێدیکاڵ، خۆشحاڵی خۆیانی دەربری بۆ بەڕێوەبردنى چالاکیەکە، هەروەک ئامادەی خۆیان دەربری بۆ بەردەوامیدا بە چالاکی دیکەى هاوبەش، کە بەهۆیەوە ئاستی رۆشنبیری تەندروستی و زانستی قوتابیانى قوتابخانەکە بەرز بکاتەوە .

ژ بو هشیارکرنا ل سەر پەنجەشێرا مەمک ماموستا اڤا حمدی سعيد سەرۆک بەشێ شیکارییا نەخوشیان ل گەل خوێندکارێن قوناغا چارێ ١٣ و ١٤ هەیڤا ١١ سەرەدان هەردوو قوتابخانا ژیندا و هەسار کر.ئارمانجا سەردانی ئەوە بوو کو گرنگیا پشکنینا دەست پێکی دیار بکەن وە هەروەسا هشماندا تەندروستی ناف مالبەت و جڤاکی خو بەلاڤ بکەن

سەرۆکایەتى بەشی بایۆمیدیکاڵ لە زانکۆی جیهان-هەولێر، بە هاوکاری تاقیگەی ئەلفارەبی بۆ دەستنیشانکردنى نەخۆشیەکان، چالاکییەکی هۆشیاری تەندروستی بە ناونیشانی (تەندروستی لە ڕەمەزاندا) لە گراند مەجیدی مۆڵ لە هەولێر بەڕێوەبرد.

لەو چالاکییەدا، کە ڕۆژی دووشەممە ڕێکەوتى (١٠/٣/٢٠٢٥) بە سەرپەرشتی مامۆستایانى یاریدەدەر (هێرۆ ئیسماعیل محمد، بەختەوەر زیاد عومەر و، زەهرا خان معروف تاهر) و، بە بەشداری چالاکانەی خوێندکارانی بەشی بایۆمیدیکاڵ لە قۆناغە جیاوازەکان بەڕێوەچوو، فێرخوازان کۆمەڵێک پشکنینی پزیشکی بێبەرامبەریان بۆ سەردانکەرانى مۆڵەکە ئەنجامدا، پشکنینەکان بریتی بوون لە: ژمارەی تەواوەتی خوێن (CBC)، هیمۆگلۆبین A1C (HbA1C)، پێوانی خوێن، جۆری خوێن، شەکر و، شیکاری پێکهاتەی جەستەی، دواتریش پشکنینەکان لەلایەن دکتۆر چرا نوری عەبدوڵڵا ئەنجامی پشکنینە دەستبەجێیەکانی شیکردنەوەیان بۆ کرا و پێشکەشى سەردانیکەران کرایەوە.

چالاکیەکە بووە مایەى خۆشحاڵى و دەستخۆشى هاوڵاتیان، هەروەک بە گرنیگەوە لە چالاکیەکەیان ڕوانى بۆ بەرزکردنەوەى ئاستى هۆشیاری تەندروستی لە مانگی پیرۆزی ڕەمەزان و، گرنگی چاودێریکردنی تەندروستی لە کاتی ڕۆژووگرتندا.

لە چوارچێوەی دەستپێشخەرییە بەردەوامەکانی خزمەتگوزاری کۆمەڵایەتی و بەرزکردنەوەى ئاستى هۆشیارى تەندروستى، سەرۆکایەتى بەشی مایکرۆبایۆلۆجی پزیشکی لە زانکۆى جیهان-هەولێر چالاکیەکى هۆشیارى تایبەت تەندروستی و پاکوخاوێنی لەنێو قوتابیانى قوتابخانەکاندا بەڕێوەبرد.

 لەو چوارچێوەیەدا، ڕۆژى چوارشەممە ڕێکەوتى (١٢/٢/٢٠٢٥)، ژمارەیەک فێرخوازی قۆناغی دووەم، بەسەرپەرشتی مامۆستاى یاریدەدەر زەهراخان مەعروف تاهر، سەردانی قوتابخانەی خانی قوبادی بنەڕەتی لە شاری هەولێریان کرد و، لە لایەن مامۆستا فەخرەدین موحسین قەساب بەڕێوەبەری قوتابخانە بەڕێز و مامۆستا کوردستان نادر بە گەرمی پێشوازییان لێکرا. پاشان لە هۆڵی چالاکى قوتابخانەکەدا فێرخوازانی بەشی مایکرۆبایۆلۆجی پزیشکی  چالاکیەکەیان پێشکەش بە قوتابیانی پۆلی پێنجەم کرد و، باسى شێوازی پاکوخاوێنی دروست و ڕێکارە سەرەتاییەکانی تەندروستیان کرد، هاوکات تیشکیان خستە سەر ستراتیژییەکانی خۆپارێزی بەتایبەت لە نەخۆشییە درمیەکان لەناو ژینگەی قوتابخانەدا، بۆ ئەوەش کۆمەڵێک ئامۆژگارى جیایان پێشکەش بە قوتابیان کرد.

لە وێتسگەیەکى دیکەى چالاکیەکەیاندا فێرخوازانى بەشى مایکرۆبایۆلۆجى پزیشکى  پۆستەرێکی پەروەردەییان پێشکەش بە بەڕێوەبەری قوتابخانەکە کرد، کە گرنگترین ڕێکارەکانی تەندروستی و پاکوخاوێنی تیایدا ڕوون کرابوەوە. هەروەها فێرخوازان شیرینییان بەسەر قوتابیانى قوتابخانەکەدا دابەشکرد. لە کۆتایشدا فێرخوازانی بەشی مایکرۆبایۆلۆجی پزیشکی سوپاس کارگێڕی قوتابخانەکەیان کرد بۆ پێشوازی گەرم و هاوکارییان لە سەرخستنی ئەم چالاکییە هۆشیارییە.

ڕۆژى پێنچ شەممە ڕێکەوتى ٦/٢/٢٠٢٥ گروپێک لە فێرخوازی بەشی مایکرۆبایۆلۆجی پزیشکی لە زانکۆی جیهان-هەولێر بە شێوەیەکی چالاکانە وەک خۆبەخش بەشدارییان لە ڕێکخستنى چالاکیەکانى “مێدیکۆ” کرد، کە لە گەورەترین پیشانگەی تەندروستی نێودەوڵەتییە لەسەر ئاستی عێراق و هەرێمی کوردستان دادەنرێت و،  تا ڕێکەوتى ٨/٢/٢٠٢٥ لە شاری هەولێر بەردەوام دەبێت.

ئەم چالاکییە پێشەنگە بووە  دەرفەتێکە بۆ سەرکردەکانی چاودێری تەندروستی و داهێنەران و پیشەگەرەکان و پسپۆڕان لە سەرانسەری وڵاتانى جیهان بەشدارى بکەن و نوێترین پێشکەوتنەکانی بواری پزیشکی نمایش بکەن. فێرخوازانى بەشى مایکرۆبایۆلۆجى پزیشکى وەک ئەندامانی ڕێکخراوی تەندروستی ئاشتی، کە ڕێکخراوێکی ناحکومییە و خزمەتگوزاری چاودێری تەندروستی و بەرنامەی هۆشیاری پێشکەش دەکات، بەشدارییان لە چالاکییەکەدا کردووە. بەشداریکردنیان بریتی بوو لە یارمەتیدان لە پشکنینی پزیشکی، ڕێنماییکردنی سەردانکەران و، چەندین چالاکى دیکەى جیا.

بەشداریکردنی فێرخوازانی زانکۆی جیهان -هەولێر لەم جۆرە چالاکیانە، پیشاندانى ڕۆڵی  پیشەیی فێرخوازان لە چاودێری تەندروستیدا بۆ داهاتوو زیاتر بەرز دەکاتەوە.

مانگی شوبات مانگی هۆشیاری شێرپەنجەیە، لەو چوارچێوەیەدا، فێرخوازانی قۆناغی دووەمی بەشی مایکرۆبایۆلۆجی پزیشکی لە زانکۆی جیهان-هەولێر، سمینارێکى زانستییان بەناونیشانی “هۆشیاری شێرپەنجە” لە قوتابخانەی ڕۆشنبیری ئەهلی لە هەولێر پێشکەش کرد.

لەو سمینارەدا، کە ڕۆژى سێ شەممە ڕێکەوتى ٤/٢/٢٠٢٥، بە سەرپەرشتی مامۆستاى یاریدەدەر هێرۆ ئیسماعیل محەمەد بەڕێوەچوو، سەرەتا فێرخوازن لەلایەن مامۆستا گارا عوسمان ئیسماعیل بەڕێوەبەری قوتابخانە  پێشوازییەکی گەرمی لێکرا و سیمینارەکەش لە هۆڵی کۆنفڕانسی قوتابخانەکە بە ئامادەبوونی ژمارەیەک لە قوتابیان و مامۆستایان بەڕێوەچوو. کە تیایدا فێرخوازانى زانکۆى جیهان-هەولێر سەرەتا کۆمەڵێک زانیارى گشتیان لەبارەى شێرپەنجە پێشکەشکرد، لەوانە هۆکارەکانی، شێوازەکانی دەستنیشانکردن و، ڕێکارەکانی خۆپارێزی بۆ کەمکردنەوەی هۆکارەکانى توشبوون بە شێرپەنجەییەکان، ئەمە جگە لە دوایین پێشکەوتنەکانی بواری زوو دەستنیشانکردنی نەخۆشییەکە، چالاکیەکە بووە هۆى بڵاوکردنەوەى هۆشیاری تەندروستی و بەرزکردنەوەی ڕۆشنبیری پزیشکی لە کۆمەڵگە بەتایبەت لە بوارى شێرپەنجە.

لە کۆتایی چالاکییەکەدا  مامۆستا گارە عوسمان ئیسماعیل بڕوانامەی پێزانینی پێشکەش بە فێرخوازانی بەشى مایکرۆبایۆلۆجى پزیشکى کرد وەک ڕێزێک بۆ هەوڵەکانیان لە گەیاندنی زانیاری پزیشکی دروست بە شێوەیەکی زانستی و ئامانجدار بە قوتابیانى قوتابخانەکەیان. لە بەرامبەردا فێرخوازان سوپاس و پێزانینی خۆیان ئاراستەی کارگێڕی قوتابخانەکە کرد بۆ ئەو پێشوازییە گەرم و میواندارییە، هەروەک سوپاس و پێزانینی سەرۆکى بەشی مایکرۆبایۆلۆجی پزیشکی لە زانکۆی جیهان – هەولێریان گەیاند بەبەڕێوەبەرى قوتابخانەکە بۆ ئەم دەرفەتەی کە بەشدار بوو لە بەرزکردنەوەی ئاستی هۆشیاری تەندروستی لای قوتابیان.

ڕۆژی یەکشەممە ڕێکەوتى (١٦/٢/٢٠٢٥) فێرخوازانى قۆناغی دووەم لە بەشی مایکرۆبایۆلۆجی پزیشکی  لە زانکۆى جیهان-هەولێر سەردانى قوتابخانەى کوردستانى گەورەیان لە شارى هەولێر کرد و سیمینارێکی هۆشیارییان لەسەر بەکتریای گەدە (Helicobacter pylori ) پێشکەش بە قوتابیانی قوتابخانەکە کرد.

 چالاکیەکە بەسەرپەرشتی مامۆستای یاریدەدەر (هێرۆ ئیسماعیل محمد) بەڕێوەچوو، سەرتاش لەلایەن مامۆستا ئازاد ڕەسووڵ فەقی خاوەنی قوتابخانەی دواناوەندی کوردستانی گەورە بە گەرمی پێشوازی لێکرا، پاشان لە هۆڵی قوتابخانە سمینارەکەیان پێشکەش کرد، لە میانەى سمینارەکەیاندا فێرخوازانى مایکرۆبایۆلۆجی پزیشکی پێشکەشکردنێکیان باسیان لە  بەکتریای گەدە (Helicobacter pylori ) کرد، بۆ ئەوەش باسیانلە چۆنیەتی گواستنەوەی بەکتریاکە کرد، بەتایبەتی لەڕێگەی خۆراکی پیس و خواردنی خێرا، هاوکات تیشکیان خستە سەر زیادبوونی ڕێژەی تووشبوون لەنێو هەرزەکاران و گەنجانی پێگەیشتوودا. لە بەشێکى دیکەى سمینارەکەیاندا، فێرخوازانى زانکۆى جیهان-هەولێر بە گرنگی باسیان لە ڕێوشوێنی خۆپارێزییەکان کرد، لەوانە دەستشۆردنی دروست، پاکوخاوێنی و پاراستنی پاکوخاوێنی کەسی.

لە بەشێکى دیکەى چالاکیەکەیاندا، فێرخوازانى زانکۆى جیهان-هەولێر مادەی تەعقیمکردنیان بەسەر قوتابیانى قوتابخانەکە دابەشکرد، ئەوەش وەک بەشێک لە هەڵمەتی هۆشیاری، لە کۆتایشدا ئازاد ڕەسووڵ فەقی سوپاس و دەستخۆشى لەو هەوڵەى فێرخوازانى بەشی مایکرۆبایۆلۆجی پزیشکی کرد، بەتایبەت کە کار بۆ بڵاوکردنەوەی هۆشیاری تەندروستی دەکەن.