لە چوارچێوەی هەوڵەکانی فێرخوازانى زانکۆ بۆ بەرزکردنەوەی ئاستی هۆشیاری کۆمەڵگە، فێرخوازانى قۆناغی دووەمی گرافیک دیزاین لە زانکۆى جیهان-هەولێر بە سەرپەرشتی مامۆستاى یاریدەدەر سەجى عەبدولهای، ڕۆژی پێنجشەممە ڕێکەوتى (١٣/٣/٢٠٢٥) هەڵمەتێکى هۆشیارییان بەڕێوەبرد، بە ئامانجی کەمکردنەوەی خێرایی لەسەر شەقامەکانی هەولێر و هاندانی شۆفێران بۆ پابەندبوون بە یاساکانی هاتوچۆ.
فێرخوازان لە میانەى هەڵمەتەکەیاندا، کۆمەڵێک وێنە و دەقی سادەیان بەکارهێنا بۆ گەیاندنى پەیامەکانی هەڵمەتى هۆشیارییەکەیان بە شێوەیەکی کاریگەر بە گروپە تەمەنە جیاوازەکان، لە میانەى هەڵمەتەکەشیاندا تیشکیان خستە سەر گرنگی پابەندبوون بە سنووری خێرایی و هۆشداریدان لە مەترسییەکانی خێرایی زیادە، هەروەها کۆمەڵێک ئامۆژگاری بۆ لێخوڕینی سەلامەتی لەخۆگرتبوو.
هەڵمەتەکەى فێرخوازان کۆمەڵێک شوێن و ناوچەى جیایی لە سنورى شارى هەولێر گرتەوە و، بەهۆیەوە پرۆشۆر و پەیامەکانیان گەیاندە شۆفران و ڕێبواران و دوکانداران و هاوڵاتیان بەگشتى.
بۆ گەیاندنى هاوکارى و دروستکردنى کەشێکى پڕ لە خۆشى و شادى بۆ منداڵان، گروپێک لە فێرخوازانى بەشی دیزاینى ناوخۆیی ڕۆژى چوارشەممە ڕێکەوتى (١٨/١٢/٢٠٢٤) بەسەرپەرشتى مامۆستاى یاریدەدەر (سجى عبد الهادي)، لە شارى هەولێر سەردانى سەنتەری ئۆتیزمی ئیماراتیان کرد.
سەرەتا مامۆستاى سەرپەرشتیار و فێرخوازانى بەشى دیزاینى ناوخۆیی لەلایەن (چیمەن جومعە نادر) بەڕێوەبەری سەنتەرەکە پێشوازییان لێکرا، ئینجا باسى لە دۆخى دەروونى و جەستەیی و ڕەفتارى منداڵانى ئۆتیزمى بۆ فێرخوازان کرد، وتیشى ئەم جۆرە چالاکیانەى کە فێرخوازانى زانکۆ ڕێکى دەخەن بەشدارە لە پاڵپشتیکردنی منداڵان لەڕووی دەروونی و کۆمەڵایەتییەوە، هەروەها ڕەنگدانەوەی ڕۆحی هاوکاری نێوان پەروەردەیی و کۆمەڵایەتییە دامەزراوەکان نیشان دەدات و، ڕەنگدانەوەى لەسەر ڕەفتار و هەڵسوکەوتى منداڵانیش دەبێ، بۆ ئەوەش سوپاسى فێرخوازانى زانکۆى جیهان-هەولێرى کرد، کە بەچالاکى و هاوکارى مرۆیی سەنتەرەکەیان بەسەردەکەنەوە.
پاشان فێرخوازانى زانکۆى جیهان-هەولێر دیارییەکانیان بەسەر منداڵانى سەنتەرەکەدا دابەشکرد و، کەشێکی پڕ لە خۆشی و شادیان دروستکرد، هاوکات فێرخوازانى زانکۆى جیهان-هەولێر لە ژووری مۆسیقا و هۆڵی وەرزشى سەنتەرەکە بەشدارییان لە چالاکییەکى هونەرى و وەرزشى کرد، ئەم چالاکییانەش یارمەتیدەر بوون لە دروستکردنی کەشێکی تایبەت بەسەربردن کاتێکى پەروەردەیی جیاواز بۆ منداڵان، بەڕێوەبردنى ئەم دەستپێشخەرییە ڕەنگدانەوەى ستراتیژى سەرۆکایەتى زانکۆى جیهان-هەولێر و بەشی دیزاینى ناوخۆییە بۆ بەرزکردنەوەی بەهاکانی بەخشین و دروستکردنى پردى پەیوەندی کۆمەڵایەتی لە نێوان فێرخوازان و توێژە جیاوازەکانى کۆمەڵگە و، بەشداریکردن لە بونیاتنانی تواناى ئەو تاکانەى کۆمەڵگە کە پێویستیان بەهاوکارى و کۆمەککردن هەیە.
ڕۆژى چوارشەممە ڕێکەوتى (٢٣/٤/٢٠٢٥) بۆنەیەکی تایبەت بۆ هەفتەی هۆشیاریی نایستان لە پەیمانگەی هیواى نابیستان لە شاری هەولێر بەڕێوەچوو، تیایدا ژمارەیەک لە فێرخوازانى بەشی ڕاگەیاندن لە زانکۆی جیهان-هەولێر بەسەرپەرشتى مامۆستاى یاریدەدەر دڵات ئیسماعیل بەشداریان لە چالاکیەکەدا کرد.
سەرەتای چالاکییەکە بە پێشکەشکردنی سروودی نیشتمانی “ئەی ڕەقیب” لەلایەن قوتابیانى نابیستاى پەیمانگەی هیواى نابیستان بە زمانی ئاماژە دەستی پێکرد. دواتر گروپێکی هونەری لە کۆمەڵگەى پەروەردەیی کۆلێژی جیهان گۆرانییەکی تایبەتیان پێشکەش کرد کە بە زمانی ئاماژە ئامادەکرابوو. هاوکات قوتابیانى پەیمانگەى هیواى نابیستان کۆمەڵێک کاری هونەری و تابلۆی سەرنجڕاکێشیان لە چوارچێوەى پێشانگەیەکدا نمایشکرد، کە ڕەنگدانەوەی داهێنان و بەهرەکانیان بوو. سەرەڕای ئەوەش، فێرخوازانى بەشى ڕاگەیاندن ڕۆڵێکی چالاکیان گێڕالە ڕێکخستن و هاوکاریکردنی قوتابییە نابیستەکان لە کاتی نمایشە هونەرییەکاندا، جگە لەوەش دیاری و شیرینییان پێشکەش بە فێرخوازانى نابیست کرد وەک ئاماژەیەک بۆ پێزانین و هاودەنگی.
هەفتەی هۆشیاری نابیستان بۆ ماوەی هەفتەیەک (لە ماوەی هەفتەی سێیەمی مانگی نیساندا) بۆ ڕێزگرتن لە مافەکانی نابیستان بۆ هۆشیارکردنەوەی گشتی بەڕێوەدەچێت، ئەم بۆنەیە لە ساڵی 1957 لەلایەن فیدراسیۆنی جیهانی نابیستانەوە دامەزراوە، ئەم هەفتەیە بە فەرمی لە زۆرێک لە وڵاتان، لەوانە عێراق و هەرێمی کوردستان بەتایبەتی ناسراوە و تیایدا چالاکى جۆراوجۆر بەڕێوەدەچێ بۆ هۆشیارکردنەوەی خەڵک لە مافی نابیستان.
لە دەستپێشخەرییەکی مرۆیی کە ڕەنگدانەوەی ڕۆحی یەکانگیرى کۆمەڵایەتییە لە مانگی ڕەمەزانی پیرۆزدا، هەریەک لە بەشی پەروەردەی گشتی و بەشی ڕاگەیاندن لە زانکۆی جیهان-هەولێر هەڵمەتی هاوبەشیان لە مانگى پیرۆزى ڕەمەزان بۆ هاوکاریکردنى خێزانە هەژار و کەمدەرامەتەکان بەڕێوەبرد.
هەڵمەتەکە لە ڕێکەوتى (٢١/٣/٢٠٢٥) بەسەرپەرشتى دکتۆر ئەحمەد عەبدولعەون سەرۆکى بەشی پەروەردەی گشتی و مامۆستاى یاریدەدەر ئەزوەر مەهدی سەرۆکى بەشی ڕاگەیاندن لە زانکۆی جیهان – هەولێر و، بەبەشدارى (مينا علاء و ڕەوان سيف) فێرخوازانى بەشى پەروەردەى گشتى و، (صفوان بهاء الدين ورنج عبد الرحمن) فێرخوازانى قۆناغى سێیەمى بەشى ڕاگەیاندن بەڕێوەچوو، لە میانەى هەڵمەتە هاوبەشکەیاندا فێرخوازان (52) سەبەتەی خۆراکیان بەسەر خێزانە کەمدەرامەتەکان و ژمارەیەک لە کرێکاران و فرۆشیارانی سەر شەقامەکان.
سەبەتەی خۆراکەکە کۆمەڵێک کەلوپەلی سەرەتایی جۆراوجۆری بۆ مانگى پیرۆزى ڕەمەزانى لە خۆگرتبوو، وەک ئاردی، ڕۆن، شەکر، برنج، گەنمەشامی و پێداویستییە سەرەکییەکانی دیکە کە یارمەتی خێزانەکان دەدەن بۆ دابینکردنی پێداویستییەکانی ژیانیان. لای خۆشیانەوە خێزانە سودمەندەکان و کرێکاران و فرۆشیاران سوپاس و پێزانینی خۆیان بۆ ئەم دەستپێشخەرییە بەخشندەیە دەربڕی و ستایشی هەوڵەکانی زانکۆیان کرد لە پێدانی هاوکاری و کۆمەکردنیان.
گروپێک لە فێرخوازانی قۆناغی سێیەمی بەشى زمانى ئینگلیزى لە زانکۆی جیهان هەولێر لە چوارچێوەى هەڵەمەتێکدا کۆمەکى دارایی ژمارەیەک لە خێزانە هەژار و کەمدەرامەتەکانى شارى هەولێریان کرد.
لەو چوارچێوەیەدا، فێرخوازان ڕۆژى چوارشەممە ڕێکەوتى (٢٦/٣/٢٠٢٥) بە سەرپەرشتی مامۆستای ياریدەدەر ڕۆژین حوسێن حوسێنی هەڵمەتێکى کۆکردنەوەى پارەیان بەڕێوەبرد، دواتریش پارە کۆکراوەکانیان بەسەر ژمارەیەک لەو خێزانە هەژار و کەمدەرامەتانەى شارى هەولێر دابەشکرد کە پێویستیان بە پشتگیرى هەیە بۆ دابینکردن و پڕکردنەوەى ژمارەیەک لە پێداویستیەکانیان بۆ ڕۆژانى جەژنى ڕەمەزانى پیرۆز .
لە میانەى هەڵمەتەکەیاندا فێرخوازانى بەشی زمانی ئينگلیزی لەسەرەتادا دابەش بوون بەسەر چەند گروپێک بۆ کۆکردنەوەی کۆمەک و هاوکاری، بەو هۆیەوە توانیان بڕێکی باش هاوکاری کۆ بکەینەوە و، لە ئەنجامدا بەیەکسانى بەسەر ژمارەیەک ماڵ و خێزان لەگەڕەکە جیاکانى شارى هەولێر دابەشیان کرد.
رۆژى چوارشەممە ڕێکەوتى (١٢/٢/٢٠٢٥)، لە چوارچێوەی کارە مەیدانیە بەردەوامەکانى زانکۆی جیهان -هەولێر بۆ بەرەوپێشبردنی ئاستى هۆشیاری ئەکادیمی و پیشەیی، سەرۆکایەتى بەشى ئەندازیارى دیزاینى ناوخۆیی سەردانێکى بۆ ژمارەیەک لە فێرخوازانى قۆناغی دووەم بەسەرپەرشتى مامۆستاى یاریدەر لانە شەهاب ئەحمەد بۆ ئامادەیی ژیارى کچان ڕێکخست.
مامۆستاى سەرپەرشتیار و فێرخوازان دواى ئەوەى لەلایەن مامۆستا ئازاد حەمەد عەبدوڵڵا، بەڕێوەبەری قوتابخانەکە پێشوازییان لێکرا، ئینجا ناوەڕۆکى باسەکەیان پێشکەش بە قوتابیانى ئامادەییەکە کرد و، تیایدا قوتابیان ئاشنای جیهانی دیزاین لە بوارە جیاوازەکان کرد ، لەگەڵ شیکردنەوەى کاریگەرییەکانی لەسەر ژیانی ڕۆژانە بۆ ئەوەش سەرەتا باسیان لە بەشى ئەندازیارى دیزاینى ناوخۆیی لە زانکۆى جیهان-هەولێر کرد، لەگەڵ ئاماژەکردن بە سوودەکانی بەشەکە و تەواوکردنى قۆناغەکانى خوێندن بەسەرکەوتویی و ئەو شوێنانەى کە دەتوانن کارى تێدا بکەن، وەک دیزاینی نیشتەجێبوون و بازرگانی، دیزاینی پێشانگە و ڕازاندنەوەی شانۆ و چەندین لایەنى دیکەى گرنگى ژیان، لە بەشێکى دیکەى سمینارەکەیاندا فێرخوازان تیشکیان خستە سەر چۆنیەتی کاریگەری ئەندازیارى دیزاینی ناوخۆیی لەسەر خۆشگوزەرانی و بەرهەمهێنان و باشترکردنی کوالیتی ژیان.
سمینارەکە بووە مایەى خۆشحاڵى فێرخوازان کە بەهۆیەوە ئاشنایى کاروبارەکانى دیزاینى ناوخۆیی و گرنگیەکانى لە ژیانی ڕۆژانە بوون.
رۆژى چوارشەممە ڕێکەوتى (١٢/٢/٢٠٢٥)، کۆمەڵێک لە فێرخوازانى قۆناغی دووەم لە بەشی تەلارسازی لە زانکۆی جیهان -هەولێر بەسەرپەرشتى مامۆستاى یاریدەدەر لانە شیهاب ئەحمەد سەردانى ئامادەیی ژیارى کوڕانیان لە شارى هەولێر کرد و، لەلایەن مامۆستا فاخیر حامد لە کارگێڕی قوتابخانەکەە پێشوازییەکی گەرمیان لێکرا.
پاشان هاوەڵى مامۆستا و فێرخوازانى کرد بۆ پێشکەشکردنى بابەتەکەیان کە تایبەت بوو بە ناساندنى ئەندازیارى تەلارسازى و گرنگى لە بوارى پلاندانى شار، بۆ ئەو مەبەستەش سەرەتا فێرخوازان باسى بەشی تەلارسازی لە زانکۆی جیهان -هەولێر و ئەو توانا ئەکادیمیەیان کرد، کە لە بەشەکەدا بەردەستن، جگە لەو دەرفەتە ئەکادیمی و پیشەییانەی کە دەتوانن سوودی لێ وەربگرن لەکاتی هەڵبژاردنی ئەم پسپۆڕییەدا بەتایبەت لە دۆزینەوەى دەرفەتى کار، لە بەشێکى دیکەى سمینارەکەیاندا فێرخوازانى زانکۆى جیهان-هەولێر بە گرنیگەوە باسیان لە ڕۆڵی تەلارسازی لە داڕشتنی شارەکان و دیزاینکردن و لایەنى جوانکاری شارەکان کرد، وەک پلاندانانی شار، دیزاینی ناوەوە و، ڕێکخستنى پڕۆژەکان بەشێوەیەکى ئەندازەیی و چەندین بابەتى دیکەى پەیوەست بە کاروبارى ئەندازیارى تەلارسازى.
سمینارەکە، بووە دەرفەتێکی ناوازە بۆ قوتابیانى ئامادەیی ژیار بۆ کارلێککردن لەگەڵ بابەتەکە و بەدەستهێنانی زانیارى ورد لەبارەى پسپۆڕی تەلارسازی و، پەرەپێدانی تواناکانیان و بەرزکردنەوەی ئاستی هۆشیارییان لە گرنگی تەلارسازی لە بونیادنانی ئایندەیەکی گەشتر.
بۆ زیادکردنى ڕێژەى ڕوبەرى سەوزایی لە شارى هەولێر؛ رۆژی یەکشەممە ڕێکەوتی (٢٣\٣\٢٠٢٥) سەرۆکایەتی بەشی کارگێری گشتی لە زانکۆى جیهان-هەولێر بەهەماهەنگى بەڕێوەبەرایەتى ئەندازەى پارەکان بەشدارى لە هەڵمەتێکى نەمام چاندن کرد.
لەم هەڵمەتەدا، کە لەلایەن مامۆستای یاریدەدەر هێڤی محمد قادر سەرپەرشتى کرا، ژمارەیەک لەفێرخوازانی قۆناغی چوارەمی بەشی کارگێری گشتی بەشدارییان کرد و، بە ئامادەبوونی سەفین ڕەشید بەرپرسی شەقامی (١٢٠) مەتری لە بەرێوەبەرایەتی ئەندازەی پارکەکان لە شاری هەولێر بەرێوەچوو دواتر، ژمارەیەک نەمامیان لە شەقامى (١٢٠) مەترى شارى هەولێر چاند، لە میانەى بەڕێوەچوونى هەڵمەتەکەشدا مامۆستاى سەرپەرشتیار بە گرنگیەوە باسى لە پێویستى زیادکردنى ڕێژەى سەوزایی کرد، بۆ ئەوەش دەستخۆشى لە فێرخوازان کرد، کە بە شێوەیەکى چالاک بە شداریان لە هەڵمەتەکەدا کرد، هەروەک سوپاسى بەرێوەبەرایەتی ئەندازەی پارکەکان لە شاری هەولێرى کرد، کە کارئاسانى و هاوبەشیان لە بەڕێوەبردنى هەڵمەتەکەدا کرد.
لە بەرانبەردا بەرپرسى بەرپرسی شەقامی (١٢٠) مەتری لە بەرێوەبەرایەتی ئەندازەی پارکەکان و ستافەکەى دەستخۆشیان لە مامۆستای سەرپەرشتیار وفێرخوازانى بەشداربوو کرد و، هیوایان خواست کە لە ئەنجامدانی ئەم جۆرە چالاکیانە بەردەوام بن.
ڕۆژی سێشەممە، ڕێکەوتى ( 2025-2-18)، فێرخوازانى قۆناغی چوارەمی بەشی کارگێڕی گشتی لە زانکۆی جیهان، لەچوارچێوەی پابەندبوونیان بە بەرپرسیارێتی کۆمەڵایەتی، خۆبەخشانە لە خانەی منداڵانى بێ سەرپەرشت لە شاری هەولێر. بە سەرپەرشتی مامۆستاى یاریدەدەر ڕاز ئازاد جەلال چالاکیەکەیان بەڕێوەبرد.
لەگەڵ گەیشتنیان لەلایەن شێروان عەبدولڕەحمان بەڕێوەبەرى خانەکە بەگەرمی پێشوازییان لێکرا، دواتر فێرخوازان نانی نیوەڕۆیان بۆ ٧٠ منداڵى خانەکە ئامادەکرد، ئەمەش ژینگەیەکی پاڵپشت و دڵخۆشکەری بۆ منداڵان دروستکرد. دوای نانخواردنی نیوەڕۆ فێرخوازان لەگەڵ منداڵەکاندا کارلێکیان دەکرد و یارییان لەگەڵدا کردن و گفتوگۆی دۆستانەیان ئاڵوگۆڕ دەکرد. ئەم ئەزموونە تێڕوانینێکی بەنرخی لەبارەی بەرنامەکانی چاودێری کۆمەڵایەتی و ئەو ئاڵنگارییانەى ڕووبەڕووی خانەی بێ سەرپەرشتان دەبنەوە پێشکەش بە فێرخوازان کرد.
لە کۆتایی سەردانەکەدا فێرخوازان و سەرپەرشتیاران سوپاس و دەستخۆشیان لە ستافى بەڕێوەبەرایەتی خانەکە کرد کە بەشێوەیەکى بەردەوام چاودێری منداڵەکان دەکەن.
لە بەردەوامى کار و چالاکیە خۆبەخشى و خێرخوازییەکانیاندا، سەرۆکایەتى بەشى کارگێڕى گشتى لە زانکۆى جیهان-هەولێر سەردانى ماڵى بێ سەرپەرشتیانیان لە شارى هەولێر کرد و چالاکیەکى خۆبەخشیان ئەنجامدا.
ڕۆژی دووشەممە ڕێکەوتى (١٠/٢/٢٠٢٥) سەرۆکایەتى بەشى کارگێڕی گشتی بەچاودێرى پرۆفیسۆری یاریدەدەر دکتۆر هاوکار قاسم پیرداود و، بەسەرپەرشتى مامۆستای یاریدەدەر ڕاز ئازاد جەلال، سەردانێکی بۆ ماڵى بێ سەرپەرشتان لە شارى هەولێر ڕێکخست، بە بەشداری چالاکانەی فێرخوازانى قۆناغی چوارەمی بەشەکە. لە میانەی سەردانەکەدا فێرخوازان پێداویستییە سەرەتاییەکانی وەک جلوبەرگ و پێداویستی ڕۆژانەیان بۆ منداڵان دابین کرد، ئەوەش بووە مایەى خۆشحاڵى منداڵانى ماڵەکە و، لەلایەن ستافى کارگێڕى ماڵەکەش سوپاسى ستافى فێرخوازان و بەشى کارگێڕى گشتى کرا.
ساڵانە لەسەر ئاستى بەشە جیاکانى زانکۆى جیهان-هەولێر وەک پابەندبوونی زانکۆ بە بەرپرسیارێتی کۆمەڵایەتی و هەوڵەکانی بۆ بەهێزکردنى هەستى خزمەتکردن و کارى خۆبەخشى و خێرخوازى چالاکى جیاواز ڕێکدەخات، ئەم چالاکیەش بەشێکە لەو هەوڵانە.
