گروپێک لە فێرخوازانى بەشی پەروەردەی گشتی لە زانکۆى جیهان-هەولێر بە چالاکیەکى هۆشیارى یادى ڕۆژى جیهانى تەندروستى دەرونى لە چەند شوێنێکى جیاوازى شارى هەولێر دەکەنەوە.
چالاکیەکە لە ڕۆژی یەکشەممە ڕێکەوتی (12/10/2025) بە سەرپەرشتی مامۆستای یاریدەدەر ڕۆژان عەلی خدر بە ناونیشانی “عەقڵت گرنگە” بەڕێوەچوو، لە میانەى چالاکییەکەیاندا فێرخوازانى بەشى پەروەردە سەردانی مەیدانییان بۆ ژمارەیەک دامەزراوە و شوێنی گشتی لە شاری هەولێر ئەنجامدا، لەوانە نەخۆشخانەی CMC، نەخۆشخانەی ڕزگاری، بەڕێوەبەرایەتی پۆلیسی پارێزگای هەولێر و باخچەی شار لە سەنتەرى شارى هەولێر.
فێرخوازان لە میانەى بەسەرکردنەوەى شوێنە جیاوازەکاندا، کۆمەڵێک زانیارى گرنگیان لەبارەى تەندروستی دەروونی و گرنگییەکەی لە هاوسەنگی ڕۆژانەی تاک پێشکەش بە هاوڵاتیان و فەرمانبەران لە دامەزراوە جیاوازەکان کرد و، جەختیان لەوە کردەوە کە بایەخدان بە تەندروستی دەروونی کەمتر نییە لە بایەخدان بە تەندروستی جەستەیی، بۆ ئەو مەبەستەش فێرخوازان گفتوگۆیان لەبارەى گرنگترین ئاڵنگارییە دەروونییە باوەکان کرد وەک دڵەڕاوکێ، خەمۆکی، سترێس و گۆشەگیری، هەروەها ئامۆژگاری پراکتیکییان پێشکەش بەهاوڵاتیان کرد بۆ پاراستنی تەندروستی دەروونی لە ڕێگەی دەربڕینی هەستەکان، ئەنجامدانی چالاکی جەستەیی، پاراستنی پەیوەندی کۆمەڵایەتی، پەیڕەوکردنی سیستمی خۆراکی و خەوی تەندروست و داواکردنی یارمەتی کاتێک پێویست بێت.
کەمپین و چالاکیەکەى فێرخوازان لەلایەن عەمید کامیل محەمەد باقر بەڕێوەبەرى گشتى پۆلیسى هەولێر و کیفاح حەسەن، وتەبێژی پۆلیسی هەولێر پێشوازییان لێکرا و، سوپاس و پێزانینی خۆیان دەربڕی بۆ ئەم دەستپێشخەرییە ئامانجدارەی فێرخوازان، کە بەشدارە لە بڵاوکردنەوەی هۆشیاری و بەهێزکردنی تەندروستی دەروونی لەنێو کۆمەڵگەدا.
گروپێک لە فێرخوازانى بەشی پەروەردەی گشتی لە زانکۆی جیهان – هەولێر ڕۆژی چوارشەممە ڕێکەوتى (24 ی ئەیلوولی 2025) بە سەرپەرشتی دکتۆر ئەحمەد عەبدولعەون سەرۆکی بەشی پەروەردەى گشتی سەردانى قوتابخانەی ئامادەیی عیرفانی کچان و سیمینارێکی زانستییان لەبارەى تواناکانی فێربوونی زمانی ئینگلیزی پێشکەش بە قوتابیانى قوتابخانەکە کرد.
لە سەرەتای سەردانەکەیاندا، فێرخوازانى بەشى پەروەردەى گشتى کە پێکهاتبوون لە هەریەک لە (زەهرا ئەحمەد، هودا حاجی ئاغا) لەلایەن مامۆستا لینا حوسێن بەرزنجی بەڕێوەبەری قوتابخانە بەگەرمی پێشوازییان لێکرا، پاشان لە هۆڵى قوتابخانەکەدا ناوەڕۆکى بابەتەکەیان پێشکەش بە قوتابیانى پۆلى دەیەکى قوتابخانەکە کرد و، تیشکیان خستە سەر گرنگی پەرەپێدانی چوار بنەماى سەرەکی زمانی ئینگلیزی ( گوێگرتن، قسەکردن، خوێندنەوە و نووسین)، هەروەک ئاماژەیان بە هەندێک یاسای ڕێزمانی بنچینەیی پێویست بۆ فێربوونی زمانکرد و، ناوەڕۆکى بابەتەکەیان بە نموونەی ڕۆژانە بۆ قوتابیان ڕوون کردەوە.
پاشان گفتوگۆیەکى پڕ بەرهەم لە نێوان فێرخوازانى زانکۆى جیهان-هەولێر و قوتابیانى قوتابخانەکە بەڕێوەچوو، کە تیایدا تیشکیان خستە سەر پرۆگرامی خوێندنی زانکۆی جیهان -هەولێر بەتایبەتی لە بەشی پەروەردەی گشت- لقی فێرکردنی زمانی ئینگلیزی و، ئاماژەیان بەوەدا کە پرۆگرامە ئەکادیمییەکان بۆ گونجاندن لەگەڵ پێداویستییەکانی دنیای ڕاستەقینە داڕێژراون و بەردەوام نوێدەکرێنەوە.
لە کۆتاییدا بەڕێوەبەری قوتابخانەکە سوپاسی فێرخوازانى زانکۆى جیهان-هەولێرى کرد بۆ هەوڵە ئەکادیمییە نایابەکانیان و هیوای سەرکەوتنی بەردەوامی بۆ خواستن. فێرخواز لای خۆیانەوە سوپاسی بەڕێوەبەرایەتی قوتابخانەیان کرد بۆ پێشوازییە گەرمەکەیان و بانگهێشتیان ئاراستەی بەڕێوەبەر کرد بۆ ئەوەی سەردانی زانکۆی جیهان- هەولێر بکات بۆ لە نزیکەوە ئاشنابوون زیاتر لەسەر پرۆگرامى ئەکادیمی و شێوازە مۆدێرنەکانی خوێندن لە زانکۆ.
ڕۆژی چوارشەممە، ڕێکەوتى (١٥/١٠/٢٠٢٥)، گروپێک لە فێرخوازانی قۆناغی چوارەمی بەشی زمانی ئینگلیزی لە زانکۆی جیهان – هەولێر، بە سەرپەرشتیی مامۆستاى یاریدەدەری مەروە مەحمود ئەمین، چالاکییەکی فێرکاریی کارلێککارانەی سەرنجڕاکێشیان لە قوتابخانەی ئامادەیی نیو بریج ئەنجامدا.
لەسەرەتای گەیشتنیان، مامۆستا ڕاوێژ ئەحمەد محەمەد، بەڕێوەبەری قوتابخانەکە، بە گەرمی پێشوازی لە فێرخوازان کرد. پاشان فێرخوازانی زانکۆ زنجیرەیەک چالاکیی فێرکاریی کارلێککارانەیان ڕێکخست کە بە شێوەیەک دیزاین کرابوون تا وانەکانی زمانی ئینگلیزی زیندووتر و قوتابی-ناوەندتر بکەن. چالاکییەکان بریتی بوون لە دروستکردنی نەخشەی بینراوی چیرۆکەکان، پرسیاری هاندان بۆ بیرکردنەوە لەبارەی کۆتایی چیرۆکەکان و بەڕێوەبردنی دانیشتنێک بە ناوی “ڕەنگدانەوەی ئەخلاقی” (Ethical Reflection)، کە لەوێ فێرخوازانی قوتابخانە بەشداربوون لە گفتوگۆی داهێنەرانە و ڕەنگدانەوەی کورت لەبارەی بەها و وانە وەرگیراوەکان. ئەم چالاکییانە هانی گەشەپێدانی بیرکردنەوەی ڕەخنەیی، داهێنان و پەیوەندیکردن بە زمانی ئینگلیزی دا، کە ئەزموونی فێربوونی قووڵتر و خۆشتر کرد.
چالاکییەکە بە هەستێکی گڕوتین و هاوکاری لە نێوان فێرخوازانی زانکۆ و قوتابخانەدا کۆتایی هات، بەجۆرێک ژینگەیەکی فێرکاریی ئیلهامبەخشی دروست کرد، کە واتا ڕاستەقینەکەی ژیاندنەوەی فێربوونی تێدا بەرجەستە بوو.
ڕۆژی سێشەممە، ڕێکەوتى (٢١/١٠/٢٠٢٥) فێرخوازانى قۆناغی چوارەمی بەشی زمانی ئینگلیزی لە زانکۆی جیهان-هەولێر، سیمیناریان بە ناونیشانی (کاریگەریی تۆڕە کۆمەڵایەتییەکان لەسەر بەرهەمهێنان و بەڕێوەبردنی کاتی هەرزەکاران) لە ئامادەیی سەنەوبەرى کچان پێشکەش بە قوتابیانى قوتابخانەکە کرد.
لەو چالاکیەدا، کە بە سەرپەرشتی مامۆستای یاریدەدەر مەروە مەحموود ئەمین بەڕێوەچوو، سەرەتا لەلایەن مامۆستا نەزال حاجی مستەفا بەڕێوەبەری قوتابخانەکە و ، مامۆستا شیلان نەصیر، مامۆستای سەرپەرشتیار بە گەرمی پێشوازییان لێکرا. پاشان لە هۆڵى قوتابخانەکەدا، فێرخوازانى بەشى زمانى ئینگلیزى باسیان لە دیاردەی ئالوودەبوون بە تۆڕە کۆمەڵایەتییەکان لە نێو هەرزەکاراندا کرد، بۆ ئەوەش جەختیان لەوە کردەوە بەکارهێنانی زیاد لە پێویستی پلاتفۆرمەکانی وەک ئینستاگرام، تیکتۆک و فەیسبووک کاریگەریی نەرێنی لەسەر کارى ڕۆژانە، ئاستی خوێندن و، لایەنى تەندروستی دەروونی لاوان دەبێت.
لە بەشێکى دیکەى سمینارەکەیاندا هەروەها ئاماژەیان بە دیارترین هۆکارەکانی ئاڵوودەبوون بە تۆڕە کۆمەڵایەتییەکان کرد، لەوانە فشاری هاوڕێیان، ئارەزووی بەدەستهێنانی قبووڵکردنی کۆمەڵایەتی، هەستکردن بە بێزاری و ئاسانی دەستڕاگەیشتن بە ناوەڕۆکی سەرنجڕاکێش.
لە وێستگەیەکى دیکەى سەردانەکەیاندا، مامۆستاى سەرپەرشتیار و فێرخوازان لەلایەن لە چوارچێوەی مامۆستا شیلان نەصیر هاوڕێتیى کران بۆ بەسەرکردنەوەى پێشانگەی هونەریی قوتابخانەکە، کە تێیدا وێنەکێشان و کارە هونەرییەکان و ئەزموونە داهێنەرەکانی قوتابیانى تیادا نمایش کرابوو.
ڕۆژی چوارشەممە، ڕێکەوتی 2025/10/1، کە هاوکاتە لەگەڵ ڕۆژى جیهانى بەساڵاچوان، گروپێک لە فێرخوازانى بەشی زمانی ئینگلیزی لە زانکۆى جیهان-هەولێر بە سەرپەرشتی مامۆستای یاریدەدەر مەروە مەحموود ئەمین هەڵمەتێکی هۆشیارییان لە پارکی سامی عەبدولڕەحمان بەڕێوەبرد.
لەو هەڵمەتى هۆشیارییەدا، کە فێرخوازانى قۆناغی سێیەمی بەشەکە بەشدارییان تێدا کرد، لە پارکى سامى عەبدولڕەحمان پەیامێکی گەنجانەیان بۆ بەهێزکردنی پێگەی بەساڵاچووان لە کۆمەڵگ بە ڕێبواران و هاوڵاتیان و گەشتیارانى پارکى سامى عەبدولڕەحمان گەیاند و، تیایدا تیشکیان خستە سەر مافەکانیان و گرنگیی چاودێریکردن و پاراستنیان لە پشتگوێخستن و دابڕانی کۆمەڵایەتی، هەر لە چوارچێوەى هەڵمەتەکەیاندا هاندانی هاوڵاتیانیان دا شێوازێکی ژیانی تەندروست و چالاک بۆ بەساڵاچوان دەستەبەر بکەن، بۆ ئەو مەبەستەش کۆمەڵێک پرۆشەر و کارتیان دابەش کرد، کە دروشمی کورتی بە زمانی ئینگلیزییان لەسەر بوو و بەهای بەساڵاچووان و ڕۆڵیان لە ژیاندا دەخستەڕوو. لەلایەکى دیکەوە فێرخوازانى بەشى زمانى ئینگلیزى داوایان لە هاوڵاتیان دەکرد ووشە و دەستەواژەکانى تایبەت بە بەساڵاچوان بە دەنگی بەرز بخوێننەوە و، دواتریش لەگەڵ کەسوکارە بەساڵاچووەکانیاندا هاوبەشی پێ بکەن، وەک هەوڵێک بۆ دروستکردنى پەیوەندیکى مرۆیی نێوان نەوەکان.
لایەنى گرنگى هەڵمەتەکە بریتى بوو لە ڕۆڵی خوێندنەوەی وەک لێهاتووییەکی سەرەکی لە فێربوونی زمانی ئینگلیزی، ئەوەش لە ڕێگەی بانگهێشتکردنی ڕێبواران و هاوڵاتیان و گەشتیارانى پارکى سامى عەبدولڕەحمان لەلایەن فێرخوازانى بەشى زمانى ئینگلیزى بۆ خوێندنەوەی ووشەکان بە دەنگی بەرز و هاوبەشیکردنیان لەگەڵ کەسانی بەساڵاچووی خێزانەکانیاندا. لە ڕێگەی ئەم هەڵمەتەوە، فێرخوازان پەیوەندیی کۆمەڵایەتییان بەهێز کرد و تیشکیان خستە سەر بەشدارییە بەنرخەکانی بەساڵاچووان لە پرۆسەی پەرەپێدانی کۆمەڵایەتیدا.
ڕۆژى سێ شەممە ڕێکەوتى (٢٣/٩/٢٠٢٥)، گروپێک لە فێرخوازانى بەشی زمانی ئینگلیزی لە زانکۆی جیهان-هەولێر، سەردانى کۆلێژی کۆڵنزیان لە شارى هەولێر کرد و سیمینارێکیان بەزمانى ئینگلیزى لەبارەى “گرنگیی ژیریی دەستکرد لە باشترکردنی تێگەیشتنی خوێندنەوەدا” پێشکەشکرد.
چالاکیەکە بە سەرپەرشتیی مامۆستای یاریدەدەر، مروە مەحموود، بەڕێوەچوو، بە گەیشتنیان، بەگەرمى لەلایەن سەفەر محەمەد حەسەن، مامۆستای زمانی ئینگلیزی، و خاتوو سارا، یاریدەدەری ڕێکخەری کۆلێژی کۆڵنز پێشوازییان لێکرا، پاشان فێرخوازانى بەشى زمانى ئینگلیزى ناوەڕۆکى سمینارەکەیان پێشکەشکرد و، بە وردی ئەوەیان شیکردەوە کە چۆن ژیریی دەستکرد (AI) بە شێوەیەکی بنەڕەتی شێوازەکانی فێرکردن و فێربوونی خوێندنەوە دەگۆڕێت. ئەوان جەختیان لە بەهای ڕەسەنی خوێندنەوە کردەوە وەک بنەمایەکی سەرەکیی توانستی زمانی ئینگلیزی، کە پێویستییەکی حاشاهەڵنەگرە بۆ پەرەپێدانی هزری ڕەخنەگرانە و، بەدەستهێنانی سەرکەوتنی ئەکادیمی و بەردەوامیدان بە فێربوون لە تەواوی ژیاندا. جگە لەمەش، لە میانەى سیمنارەکەیاندا ڕوونیان کردەوە چۆن تێکەڵکردنی ستراتیژییانەی تەکنەلۆژیای ژیریی دەستکرد دەتوانێت بە شێوەیەکی کاریگەر ئەو ئاستەنگە باوانە کەم بکاتەوە کە فێرخوازان ڕووبەڕوویان دەبنەوە، لەوانە کەمیی وشە، زەحمەتییەکانی تێگەیشتن ..هتد.
سمینارە زانستییەکەى فێرخوازان بە پرسیار و وەڵامی کارلێککارانە کۆتایی هات، کە تێیدا ئامادەبووان پرسیاری پەیوەندیداریان دەربارەی بەکارهێنان و کاریگەرییەکانی ژیریی دەستکرد لە پەروەردەدا کرد، پاشان، ئاڵوگۆڕێکی بەرهەمداری زانیاری و تێڕوانین لە نێوان فێرخوازانى زانکۆی جیهان-هەولێر و فێرخوازانى کۆلێژی کۆڵنز بۆ زمانی ئینگلیزی ڕوویدا.
بۆ بەرزکردنەوەى ئاستى شارەزایی کارمەندانى پۆلیسى پاسەوانى سنور و ڕاهێنانیان لە بوارى فریاگوزارى سەرەتایی و چۆنیەتى مامەڵەکردن لەگەڵ دۆخە جیاوازەکان، لە نەخۆشخانەی ئەربیلى نێودەوڵەتی بەڕێوەچوو.
لەو خولەدا، کە بەهەماهەنگى نێوان وەزارەتی ناوخۆ و نەخۆشخانەى ئەربیلى نێودەوڵەتى ڕێکخرابوو، دوو فێرخوازى بەشى پەرستارى تەندروستى کۆمەڵ، کە پێکهاتبوون لە (عوسمان ڕەسوڵ عالی و ڕەشاد عیزەدین ڕەشاد) وانەکانى خولەکەیان بەشێوەیەکى سەرکەوتوو پێشکەشکرد و ڕاهێنانیان بە کارمەندانى بە پاسەوانی سنوور کرد.
لەو خولەدا، کە بۆ ماوەى پێنچ ڕۆژ بەردەوام بوو، ڕۆژی یەکشەممە، ڕێکەوتى (2025/9/14) دەستیپێکرد و تا ڕێکەوتى (2025/9/18) بەردەوام بوو، تیایدا (21) کارمەندى پاسەوانی سنوور بەشدارییان تێدا کرد و، لەلایەن فێرخوازانى زانکۆى جیهان-هەولێر چەندین بابەتی سەرەکی لە بواری فریاگوزاری سەرەتاییدا پێشکەشکران لەوانە: چۆنیەتی مامەڵەکردن لەگەڵ شۆک، حاڵەتەکانی نزمبوونەوە و بەرزبوونەوەی پەستانی خوێن (Hypotension & Hypertension)، هەروەها فێرخوازیان باسیان لە چۆنیەتی چارەسەرکردنی سووتان و شکاوی کرد، لەگەڵ چۆنیەتی مامەڵەکردن لەگەڵ حاڵەتەکانی نزمبوونەوەی شەکری خوێن (Hypoglycemia) و بەرزبوونەوەی شەکری خوێن (Hyperglycemia)، جگە لە ڕاهێنانی کارمەندان بەشێوەیەکى پراکتیکی لەسەر گەڕاندنەوەی سوڕی خوێن و هەناسەدان (CPR) و شیکردنەوەی دۆخی ڕزگارکردن (Recovery Position)، بە شێوەیەک کە یارمەتیدەر بوون لە ڕزگارکردنی ژیانی نەخۆشەکان پێش گەیشتنیان بە نەخۆشخانە و تواناکانیان لە ئەرکەکانیان لە مەیداندا بەهێز بکات.
لە کۆتایی خولەکەشدا، بڕوانامەى بەشداریکردن بەسەر یەک یەکەى بەشداربوانى کارمەندانى پاسەوانى سنور دابەشکرا.
ڕۆژی یەکشەممە، ڕێکەوتی 2025/10/12، بەشی شیکاری تاقیگەیی پزیشکی لە زانکۆی جیهان – هەولێر، بە سەرپەرشتی مامۆستای یاریدەدەر (سالی خەلیل باقر)، گەشتێکی زانستی بۆ فێرخوازانى قۆناغی چوارەم بۆ قوتابخانەی هەڵمەتى تایبەت بە کوڕان لە شارى هەولێر ڕێکخست.
فێرخوازان سەرەتا لەلایەن مامۆستا (گەردۆ مەجید)، بەڕێوەبەری قوتابخانەکە، پێشوازییان لێکرا، لە وتەیەکدا سوپاس و پێزانینی خۆی دەربڕی بۆ دەستپێشخەریەکەى فێرخوازانى زانکۆی جیهان-هەولێر بۆ بڵاوکردنەوەى هۆشیاری لەناو توێژی فێرخوازان و هەرزەکاران.
دواتر، لە میانی سەردانەکەدا، فێرخوازانى بەشی شیکاری تاقیگەیی پزیشکی چالاکیەکەیان دەستپێکرد، بۆ ئەو مەبەستەش سیمینارێکیان بە ناونیشانی “زیانەکانی جگەرەکێشان و مەترسییەکانی خواردنەوەکان لەسەر تەندروستی مرۆڤ” پێشکەش کرد، بۆ ئەوەش بە شێوەیەکی زانستی و وورد، باسیان لە زیانە تەندروستییەکانی جگەرەکێشان کرد، بەتایبەت ئاماژەیان بە کاریگەرییەکانی نیکۆتین و یەکەم ئۆکسیدی کاربۆنیان لەسەر کۆئەندامی هەناسە و سوڕی خوێن کرد، هەروەها ڕۆڵی ئەم ماددانە لە تەسکبوونەوەی بۆرییەکانی خوێن و لاوازکردنی کارایی دڵ و سییەکان بۆ قوتابیانى قوتابخانەکە ڕوون کردەوە و، ئاماژەیان بە پەیوەندی نێوان جگەرەکێشان و تووشبوون بە شێرپەنجەی سییەکان، قوڕگ و میزڵدان کرد.
سەبارەت بە ماددە هۆشبەرەکانیش، فێرخوازانى بەشی شیکاری تاقیگەیی پزیشکى باسیان لە کاریگەرییە ژەهراوییەکانی لەسەر جگەر و کۆئەندامی دەمار کرد، هەروەک جەختیان لەسەر ڕۆڵی ماددە هۆشبەرەکان لە تێکدانی کارەکانی جەستە و لاوازکردنی تێگەیشتن و سەرنجدان کرد، لە کۆتایشدا ئاماژەیان بەو فاکتەرە کۆمەڵایەتییانە کرد، کە یارمەتیدەرن لە بڵاوبوونەوەی ئەو خووە نا تەندروستانە لە نێوان هەرزەکاران بەتایبەت، بۆ ئەوەش کۆمەڵێک ئامۆژگارى جیایان پێشکە بە قوتابیان کرد بۆ خۆبەدورگرتن لە جگەڕەکێشان و ماددە هۆشبەرەکان.
ڕۆژی پێنجشەممە، ڕێکەوتی 2/10/2025، سەرۆکایەتى بەشی شیکاریی تاقیگەی پزیشکی لە کۆلێژی زانستە کردارییەکان – زانکۆی جیهان – هەولێر، بە سەرپەرشتیی مامۆستای یاریدەدەر (سالی خەلیل باقر)، سەردانێکی زانستی بۆ فێرخوازانى قۆناغی دووەم بۆ قوتابخانەی ڕەوای ناحکومی ڕێکخست.
لە میانی سەردانەکەیاندا، فێرخوازانى بەشی شیکاریی تاقیگەی پزیشکی سیمینارێکی هۆشیارکردنەوەیان بە ناونیشانی “قەڵەوی و کاریگەرییەکانی لەسەر نەخۆشیی شەکرە و تەندروستی گشتیی هەرزەکاران” پێشکەش کرد، هەر لە سیمینارەکەدا، هۆکارە باوەکانی زیادبوونی کێش لەم قۆناغە تەمەنییەدا و پەیوەندیی نزیکی نێوان شێوازی ژیان، خۆراک و چالاکییە ڕۆژانەکانیان بۆ قوتابیانى قوتابخانەکە شیکردەوە، هەروەها بە شێوەیەکی سادە میکانیزمی کاریگەریی قەڵەوی لەسەر بەرگریی ئەنسۆلین و مەترسیی تووشبوون بە شەکرە لە تەمەنێکی زوودا بۆ قوتابیان ڕونکردەوە.
دواتر، فێرخوازانى بەشى شیکاریی تاقیگەى پزیشکى؛ پشکنینی ئاستی شەکری خوێنیان (Blood Glucose Test) بۆ ژمارەیەک لە قوتابیانی قوتابخانەکە ئەنجام دا و هەنگاوە سەرەکییەکانی خوێندنەوە و لێکدانەوەی ئەنجامەکان بە شێوازێکی زانستیی سادە بۆ قوتابیانیان ڕونکردەوە. هاوکات قوتابیانیان بە شێوەیەکی پراکتیکی ئاشنایی چۆنیەتى پشکنینی دیاریکردنی جۆری خوێن (Blood Group Test) وکرد، لەگەڵ ئاماژەکردن بە گرنگیی زانینی جۆری خوێنیان لە کاتی پزیشکیی کتوپڕ و بەخشینی خوێندا.
لە کۆتاییدا ستافی قوتابخانە ستایشی هەوڵەکانی فێرخوازانى بەشی شیکاریی تاقیگەی پزیشکییان کرد بۆ گەیاندنی زانیارییە پزیشکییەکان بە شێوازێکی سادە و سوودبەخش، هەروەک جەختیشیان لەسەر گرنگیی بەردەوامبوونی ئەم جۆرە چالاکییە هۆشیاریانە کردەوە، کە هاوکاریی نێوان زانکۆ و دامەزراوە پەروەردەییەکان بەهێز دەکەن و بەشدارن لە بڵاوکردنەوەی ڕۆشنبیریی تەندروستی لەنێو قوتابیاندا.
لە ڕۆژی یەکشەممە، ڕێکەوتی (١٩-١٠-٢٠٢٥)، بەشی شیکاری تاقیگەی پزیشکیی لە زانکۆی جیهان – هەولێر، بە سەرپەرشتی مامۆستای یاریدەدەر سالی خەلیل باقر، سەردانێکی مرۆیی بۆ فێرخوازانى قۆناغی چوارەم بۆ خانەی بێ سەرپەرشتان لە هەولێر ڕێکخست.
فێرخوازان بەگەرمى لەلایەن شێروان عەبدولڕەحمان پێشوازییان لێکرا، ئینجا بە وردی ڕوونکردنەوەی دەربارەی میکانیزمی بەڕێوەبردنی خانەکە و ژمارەی منداڵانی نیشتەجێبوو پێشکەش بە فێرخوازان کرد، جگە لە بەرنامە پەروەردەیی و فێرکاری و دەروونییەکان کە پێشکەشیان دەکرێت بۆ دڵنیابوون لە ژینگەیەکی ئارام و پشتیوان بۆ گەشەکردن و پەرەپێدانی تواناکانیان بەوردى بۆ فێرخوازان شیکردەوە. دواتر، فێرخوازان سەردانى بەشەکانى دامەزراوەکەیان کرد و ئاشناى خزمەتگوزارییە ڕۆژانەییەکانی خانەکە بوون، هەروەها گوێیان لە ڕوونکردنەوەیەک دەربارەی ئەو ئاستەنگانە گرت کە ستافی کارمەند لەم بوارە مرۆییە گرنگەدا ڕووبەڕوویان دەبێتەوە.
لە وێستگەیەکى دیکەى سەردانەکەیاندا، فێرخوازان سەد دیارییان بەسەر منداڵاندا دابەشکرد، هەروەک سوپاس سەرپەرشتیار و کارمەندانى دامەزراوەکەیان کرد، لە بەرامبەردا سەرپەرشتیاران بە گرنگیەوە باسیان لە چالاکییەکە کرد و وتیان چالاکى لەم شێوەیە یارمەتیدەرە بۆ پەرەپێدانی هۆشیاریی مرۆیی و کۆمەڵایەتی.
