ڕۆژی چوارشەممە، ڕێکەوتی 2025/10/1، کە هاوکاتە لەگەڵ ڕۆژى جیهانى بەساڵاچوان، گروپێک لە فێرخوازانى بەشی زمانی ئینگلیزی لە زانکۆى جیهان-هەولێر بە سەرپەرشتی مامۆستای یاریدەدەر مەروە مەحموود ئەمین هەڵمەتێکی هۆشیارییان لە پارکی سامی عەبدولڕەحمان بەڕێوەبرد.
لەو هەڵمەتى هۆشیارییەدا، کە فێرخوازانى قۆناغی سێیەمی بەشەکە بەشدارییان تێدا کرد، لە پارکى سامى عەبدولڕەحمان پەیامێکی گەنجانەیان بۆ بەهێزکردنی پێگەی بەساڵاچووان لە کۆمەڵگ بە ڕێبواران و هاوڵاتیان و گەشتیارانى پارکى سامى عەبدولڕەحمان گەیاند و، تیایدا تیشکیان خستە سەر مافەکانیان و گرنگیی چاودێریکردن و پاراستنیان لە پشتگوێخستن و دابڕانی کۆمەڵایەتی، هەر لە چوارچێوەى هەڵمەتەکەیاندا هاندانی هاوڵاتیانیان دا شێوازێکی ژیانی تەندروست و چالاک بۆ بەساڵاچوان دەستەبەر بکەن، بۆ ئەو مەبەستەش کۆمەڵێک پرۆشەر و کارتیان دابەش کرد، کە دروشمی کورتی بە زمانی ئینگلیزییان لەسەر بوو و بەهای بەساڵاچووان و ڕۆڵیان لە ژیاندا دەخستەڕوو. لەلایەکى دیکەوە فێرخوازانى بەشى زمانى ئینگلیزى داوایان لە هاوڵاتیان دەکرد ووشە و دەستەواژەکانى تایبەت بە بەساڵاچوان بە دەنگی بەرز بخوێننەوە و، دواتریش لەگەڵ کەسوکارە بەساڵاچووەکانیاندا هاوبەشی پێ بکەن، وەک هەوڵێک بۆ دروستکردنى پەیوەندیکى مرۆیی نێوان نەوەکان.
لایەنى گرنگى هەڵمەتەکە بریتى بوو لە ڕۆڵی خوێندنەوەی وەک لێهاتووییەکی سەرەکی لە فێربوونی زمانی ئینگلیزی، ئەوەش لە ڕێگەی بانگهێشتکردنی ڕێبواران و هاوڵاتیان و گەشتیارانى پارکى سامى عەبدولڕەحمان لەلایەن فێرخوازانى بەشى زمانى ئینگلیزى بۆ خوێندنەوەی ووشەکان بە دەنگی بەرز و هاوبەشیکردنیان لەگەڵ کەسانی بەساڵاچووی خێزانەکانیاندا. لە ڕێگەی ئەم هەڵمەتەوە، فێرخوازان پەیوەندیی کۆمەڵایەتییان بەهێز کرد و تیشکیان خستە سەر بەشدارییە بەنرخەکانی بەساڵاچووان لە پرۆسەی پەرەپێدانی کۆمەڵایەتیدا.
ڕۆژى سێ شەممە ڕێکەوتى (٢٣/٩/٢٠٢٥)، گروپێک لە فێرخوازانى بەشی زمانی ئینگلیزی لە زانکۆی جیهان-هەولێر، سەردانى کۆلێژی کۆڵنزیان لە شارى هەولێر کرد و سیمینارێکیان بەزمانى ئینگلیزى لەبارەى “گرنگیی ژیریی دەستکرد لە باشترکردنی تێگەیشتنی خوێندنەوەدا” پێشکەشکرد.
چالاکیەکە بە سەرپەرشتیی مامۆستای یاریدەدەر، مروە مەحموود، بەڕێوەچوو، بە گەیشتنیان، بەگەرمى لەلایەن سەفەر محەمەد حەسەن، مامۆستای زمانی ئینگلیزی، و خاتوو سارا، یاریدەدەری ڕێکخەری کۆلێژی کۆڵنز پێشوازییان لێکرا، پاشان فێرخوازانى بەشى زمانى ئینگلیزى ناوەڕۆکى سمینارەکەیان پێشکەشکرد و، بە وردی ئەوەیان شیکردەوە کە چۆن ژیریی دەستکرد (AI) بە شێوەیەکی بنەڕەتی شێوازەکانی فێرکردن و فێربوونی خوێندنەوە دەگۆڕێت. ئەوان جەختیان لە بەهای ڕەسەنی خوێندنەوە کردەوە وەک بنەمایەکی سەرەکیی توانستی زمانی ئینگلیزی، کە پێویستییەکی حاشاهەڵنەگرە بۆ پەرەپێدانی هزری ڕەخنەگرانە و، بەدەستهێنانی سەرکەوتنی ئەکادیمی و بەردەوامیدان بە فێربوون لە تەواوی ژیاندا. جگە لەمەش، لە میانەى سیمنارەکەیاندا ڕوونیان کردەوە چۆن تێکەڵکردنی ستراتیژییانەی تەکنەلۆژیای ژیریی دەستکرد دەتوانێت بە شێوەیەکی کاریگەر ئەو ئاستەنگە باوانە کەم بکاتەوە کە فێرخوازان ڕووبەڕوویان دەبنەوە، لەوانە کەمیی وشە، زەحمەتییەکانی تێگەیشتن ..هتد.
سمینارە زانستییەکەى فێرخوازان بە پرسیار و وەڵامی کارلێککارانە کۆتایی هات، کە تێیدا ئامادەبووان پرسیاری پەیوەندیداریان دەربارەی بەکارهێنان و کاریگەرییەکانی ژیریی دەستکرد لە پەروەردەدا کرد، پاشان، ئاڵوگۆڕێکی بەرهەمداری زانیاری و تێڕوانین لە نێوان فێرخوازانى زانکۆی جیهان-هەولێر و فێرخوازانى کۆلێژی کۆڵنز بۆ زمانی ئینگلیزی ڕوویدا.
بۆ بەرزکردنەوەى ئاستى شارەزایی کارمەندانى پۆلیسى پاسەوانى سنور و ڕاهێنانیان لە بوارى فریاگوزارى سەرەتایی و چۆنیەتى مامەڵەکردن لەگەڵ دۆخە جیاوازەکان، لە نەخۆشخانەی ئەربیلى نێودەوڵەتی بەڕێوەچوو.
لەو خولەدا، کە بەهەماهەنگى نێوان وەزارەتی ناوخۆ و نەخۆشخانەى ئەربیلى نێودەوڵەتى ڕێکخرابوو، دوو فێرخوازى بەشى پەرستارى تەندروستى کۆمەڵ، کە پێکهاتبوون لە (عوسمان ڕەسوڵ عالی و ڕەشاد عیزەدین ڕەشاد) وانەکانى خولەکەیان بەشێوەیەکى سەرکەوتوو پێشکەشکرد و ڕاهێنانیان بە کارمەندانى بە پاسەوانی سنوور کرد.
لەو خولەدا، کە بۆ ماوەى پێنچ ڕۆژ بەردەوام بوو، ڕۆژی یەکشەممە، ڕێکەوتى (2025/9/14) دەستیپێکرد و تا ڕێکەوتى (2025/9/18) بەردەوام بوو، تیایدا (21) کارمەندى پاسەوانی سنوور بەشدارییان تێدا کرد و، لەلایەن فێرخوازانى زانکۆى جیهان-هەولێر چەندین بابەتی سەرەکی لە بواری فریاگوزاری سەرەتاییدا پێشکەشکران لەوانە: چۆنیەتی مامەڵەکردن لەگەڵ شۆک، حاڵەتەکانی نزمبوونەوە و بەرزبوونەوەی پەستانی خوێن (Hypotension & Hypertension)، هەروەها فێرخوازیان باسیان لە چۆنیەتی چارەسەرکردنی سووتان و شکاوی کرد، لەگەڵ چۆنیەتی مامەڵەکردن لەگەڵ حاڵەتەکانی نزمبوونەوەی شەکری خوێن (Hypoglycemia) و بەرزبوونەوەی شەکری خوێن (Hyperglycemia)، جگە لە ڕاهێنانی کارمەندان بەشێوەیەکى پراکتیکی لەسەر گەڕاندنەوەی سوڕی خوێن و هەناسەدان (CPR) و شیکردنەوەی دۆخی ڕزگارکردن (Recovery Position)، بە شێوەیەک کە یارمەتیدەر بوون لە ڕزگارکردنی ژیانی نەخۆشەکان پێش گەیشتنیان بە نەخۆشخانە و تواناکانیان لە ئەرکەکانیان لە مەیداندا بەهێز بکات.
لە کۆتایی خولەکەشدا، بڕوانامەى بەشداریکردن بەسەر یەک یەکەى بەشداربوانى کارمەندانى پاسەوانى سنور دابەشکرا.
ڕۆژی یەکشەممە، ڕێکەوتی 2025/10/12، بەشی شیکاری تاقیگەیی پزیشکی لە زانکۆی جیهان – هەولێر، بە سەرپەرشتی مامۆستای یاریدەدەر (سالی خەلیل باقر)، گەشتێکی زانستی بۆ فێرخوازانى قۆناغی چوارەم بۆ قوتابخانەی هەڵمەتى تایبەت بە کوڕان لە شارى هەولێر ڕێکخست.
فێرخوازان سەرەتا لەلایەن مامۆستا (گەردۆ مەجید)، بەڕێوەبەری قوتابخانەکە، پێشوازییان لێکرا، لە وتەیەکدا سوپاس و پێزانینی خۆی دەربڕی بۆ دەستپێشخەریەکەى فێرخوازانى زانکۆی جیهان-هەولێر بۆ بڵاوکردنەوەى هۆشیاری لەناو توێژی فێرخوازان و هەرزەکاران.
دواتر، لە میانی سەردانەکەدا، فێرخوازانى بەشی شیکاری تاقیگەیی پزیشکی چالاکیەکەیان دەستپێکرد، بۆ ئەو مەبەستەش سیمینارێکیان بە ناونیشانی “زیانەکانی جگەرەکێشان و مەترسییەکانی خواردنەوەکان لەسەر تەندروستی مرۆڤ” پێشکەش کرد، بۆ ئەوەش بە شێوەیەکی زانستی و وورد، باسیان لە زیانە تەندروستییەکانی جگەرەکێشان کرد، بەتایبەت ئاماژەیان بە کاریگەرییەکانی نیکۆتین و یەکەم ئۆکسیدی کاربۆنیان لەسەر کۆئەندامی هەناسە و سوڕی خوێن کرد، هەروەها ڕۆڵی ئەم ماددانە لە تەسکبوونەوەی بۆرییەکانی خوێن و لاوازکردنی کارایی دڵ و سییەکان بۆ قوتابیانى قوتابخانەکە ڕوون کردەوە و، ئاماژەیان بە پەیوەندی نێوان جگەرەکێشان و تووشبوون بە شێرپەنجەی سییەکان، قوڕگ و میزڵدان کرد.
سەبارەت بە ماددە هۆشبەرەکانیش، فێرخوازانى بەشی شیکاری تاقیگەیی پزیشکى باسیان لە کاریگەرییە ژەهراوییەکانی لەسەر جگەر و کۆئەندامی دەمار کرد، هەروەک جەختیان لەسەر ڕۆڵی ماددە هۆشبەرەکان لە تێکدانی کارەکانی جەستە و لاوازکردنی تێگەیشتن و سەرنجدان کرد، لە کۆتایشدا ئاماژەیان بەو فاکتەرە کۆمەڵایەتییانە کرد، کە یارمەتیدەرن لە بڵاوبوونەوەی ئەو خووە نا تەندروستانە لە نێوان هەرزەکاران بەتایبەت، بۆ ئەوەش کۆمەڵێک ئامۆژگارى جیایان پێشکە بە قوتابیان کرد بۆ خۆبەدورگرتن لە جگەڕەکێشان و ماددە هۆشبەرەکان.
ڕۆژی پێنجشەممە، ڕێکەوتی 2/10/2025، سەرۆکایەتى بەشی شیکاریی تاقیگەی پزیشکی لە کۆلێژی زانستە کردارییەکان – زانکۆی جیهان – هەولێر، بە سەرپەرشتیی مامۆستای یاریدەدەر (سالی خەلیل باقر)، سەردانێکی زانستی بۆ فێرخوازانى قۆناغی دووەم بۆ قوتابخانەی ڕەوای ناحکومی ڕێکخست.
لە میانی سەردانەکەیاندا، فێرخوازانى بەشی شیکاریی تاقیگەی پزیشکی سیمینارێکی هۆشیارکردنەوەیان بە ناونیشانی “قەڵەوی و کاریگەرییەکانی لەسەر نەخۆشیی شەکرە و تەندروستی گشتیی هەرزەکاران” پێشکەش کرد، هەر لە سیمینارەکەدا، هۆکارە باوەکانی زیادبوونی کێش لەم قۆناغە تەمەنییەدا و پەیوەندیی نزیکی نێوان شێوازی ژیان، خۆراک و چالاکییە ڕۆژانەکانیان بۆ قوتابیانى قوتابخانەکە شیکردەوە، هەروەها بە شێوەیەکی سادە میکانیزمی کاریگەریی قەڵەوی لەسەر بەرگریی ئەنسۆلین و مەترسیی تووشبوون بە شەکرە لە تەمەنێکی زوودا بۆ قوتابیان ڕونکردەوە.
دواتر، فێرخوازانى بەشى شیکاریی تاقیگەى پزیشکى؛ پشکنینی ئاستی شەکری خوێنیان (Blood Glucose Test) بۆ ژمارەیەک لە قوتابیانی قوتابخانەکە ئەنجام دا و هەنگاوە سەرەکییەکانی خوێندنەوە و لێکدانەوەی ئەنجامەکان بە شێوازێکی زانستیی سادە بۆ قوتابیانیان ڕونکردەوە. هاوکات قوتابیانیان بە شێوەیەکی پراکتیکی ئاشنایی چۆنیەتى پشکنینی دیاریکردنی جۆری خوێن (Blood Group Test) وکرد، لەگەڵ ئاماژەکردن بە گرنگیی زانینی جۆری خوێنیان لە کاتی پزیشکیی کتوپڕ و بەخشینی خوێندا.
لە کۆتاییدا ستافی قوتابخانە ستایشی هەوڵەکانی فێرخوازانى بەشی شیکاریی تاقیگەی پزیشکییان کرد بۆ گەیاندنی زانیارییە پزیشکییەکان بە شێوازێکی سادە و سوودبەخش، هەروەک جەختیشیان لەسەر گرنگیی بەردەوامبوونی ئەم جۆرە چالاکییە هۆشیاریانە کردەوە، کە هاوکاریی نێوان زانکۆ و دامەزراوە پەروەردەییەکان بەهێز دەکەن و بەشدارن لە بڵاوکردنەوەی ڕۆشنبیریی تەندروستی لەنێو قوتابیاندا.
لە ڕۆژی یەکشەممە، ڕێکەوتی (١٩-١٠-٢٠٢٥)، بەشی شیکاری تاقیگەی پزیشکیی لە زانکۆی جیهان – هەولێر، بە سەرپەرشتی مامۆستای یاریدەدەر سالی خەلیل باقر، سەردانێکی مرۆیی بۆ فێرخوازانى قۆناغی چوارەم بۆ خانەی بێ سەرپەرشتان لە هەولێر ڕێکخست.
فێرخوازان بەگەرمى لەلایەن شێروان عەبدولڕەحمان پێشوازییان لێکرا، ئینجا بە وردی ڕوونکردنەوەی دەربارەی میکانیزمی بەڕێوەبردنی خانەکە و ژمارەی منداڵانی نیشتەجێبوو پێشکەش بە فێرخوازان کرد، جگە لە بەرنامە پەروەردەیی و فێرکاری و دەروونییەکان کە پێشکەشیان دەکرێت بۆ دڵنیابوون لە ژینگەیەکی ئارام و پشتیوان بۆ گەشەکردن و پەرەپێدانی تواناکانیان بەوردى بۆ فێرخوازان شیکردەوە. دواتر، فێرخوازان سەردانى بەشەکانى دامەزراوەکەیان کرد و ئاشناى خزمەتگوزارییە ڕۆژانەییەکانی خانەکە بوون، هەروەها گوێیان لە ڕوونکردنەوەیەک دەربارەی ئەو ئاستەنگانە گرت کە ستافی کارمەند لەم بوارە مرۆییە گرنگەدا ڕووبەڕوویان دەبێتەوە.
لە وێستگەیەکى دیکەى سەردانەکەیاندا، فێرخوازان سەد دیارییان بەسەر منداڵاندا دابەشکرد، هەروەک سوپاس سەرپەرشتیار و کارمەندانى دامەزراوەکەیان کرد، لە بەرامبەردا سەرپەرشتیاران بە گرنگیەوە باسیان لە چالاکییەکە کرد و وتیان چالاکى لەم شێوەیە یارمەتیدەرە بۆ پەرەپێدانی هۆشیاریی مرۆیی و کۆمەڵایەتی.
پیشانگەی (Agro Pack, Food & Plast Iraq 2025) ، کە یەکێکە لە گەورەترین و گرنگترین پیشانگەی تایبەتمەندی عێراق لە کەرتەکانی کشتوکاڵ، خۆراک، لەقوتوونان (Packaging) و پیشەسازییەکانی پلاستیک و، لە شارى هەولێر دەستى بە چالاکیەکانى کرد.
لەو چوارچێوەیەدا، فێرخوازانی قۆناغی دووەمی بەشی ئەندازیاری پرۆگرامسازى و ئينفۆرماتيك بە سەرپەرشتی مامۆستای یاریدەدەر “یەزەن سەیفەدین” ڕۆژی چوارشەممە ڕێکەوتى ٢٦/١١/٢٠٢٥ سەردانی پیشانگەی Agro Pack, Food & Plast Iraq 2025 یان كرد، لەو پیشانگەیەدا کە لە ٢٤ تا ٢٧ی تشرینی دووەمی ٢٠٢٥ بەڕێوەدەچێت، زیاتر لە ٤٠٠ کۆمپانیاى ناوخۆیی و نێودەوڵەتى بەشدارییان تیادا کردوە و، نوێترین تەکنەلۆژیا و داهێنان و بەرهەمەکانیان نمایش کردوە.
لە ڕێگەی سەردانکردن و بەشداریکردن لەم پیشانگەیەدا، فێرخوازانی بەشەکە وێنەیەکی ڕوونیان دەربارەی چۆنیەتی بەکارهێنانی تەکنەلۆژیا لە پیشەسازییە مۆدێرنەکاندا دەسكەوت، بەتایبەت تەکنیکەکانی دیجیتاڵکردن و گۆڕانی زیرەک لە کارگەکان، بەرنامەکانی بەڕێوەبردنی بەرهەمهێنان و خزمەتگوزارییە لۆجستییەکان، سیستمەکانی کۆنتڕۆڵ و بەدواداچوون و، چارەسەرە سۆفتوێرییەکانی تایبەت بە جۆریی بەرهەم و سەلامەتی خۆراک. هەروەها بووە دەرفەتێک بۆ کردنەوەی ئاسۆی هاوکاری لەگەڵ کۆمپانیاکان بۆ دابینکردنی ڕاهێنان و هەلی کار لە ئایندەدا.
لە چوارچێوەی هەوڵەکانی بۆ خزمەتکردنی کۆمەڵگە و بەرزکردنەوەی ئاستی هۆشیاری تەندروستی، فێرخوازانى بەشى بایۆمیدیکاڵ لە زانکۆى جیهان-هەولێر چالاکییەکی گشتى بۆ هۆشیارکردنەوەی تەندروستی گشتی لە فامیلی مۆڵی هەولێر بەڕێوەبرد.
لە میانەى ئەو چالاکییەدا، کە ڕۆژی هەینی، ڕێکەوتى (١٤/١١/٢٠٢٥) بەبۆنەى ڕۆژى جیهانى شەکرە بە سەرپەرشتی مامۆستای یاریدەدەر هێرۆ ئیسماعیل محەمەد و خاتوو نەزا حەمید عەلی بەڕێوەبرا، بە درێژایی رۆژەکە، فێرخوازان پشکنینی تەندروستی بێبەرامبەریان بۆ ڕێبواران و هاوڵاتیان و گەشتیارانى مۆڵەکە ئەنجامدا، پشکنینەکان بریتبوون لە پشکنینى ئاستی شەکری خوێن، پێوانەکردنی فشاری خوێن و دیاریکردنی جۆری خوێن.
چالاکییەکە بە هاوکاری لەگەڵ تاقیگەی نوور ئەنجامدرا، کە پشکنینی HbA1C بە خۆڕایی پێشکەش کرد، ئەمەش نیشاندەرێکی سەرەکییە بۆ کۆنترۆڵکردنی درێژخایەنی ئاستی شەکری خوێن. هەروەها سەنتەری دایت نیوتریشین بە پێشکەشکردنی شیکاریی خۆڕایی بۆ پێکهاتەی جەستە بەشداربوو. لە میانەى چالاکیەکەدا فێرخوازان و سەرپەرشتیاران ئەنجامى پشکنینەکانیان لە شوێنی چالاکییەکەدا شیکردەوە و پێشکەشى ئەوانەیان کردەوە کە پشکنینەکانیان بۆ کرا، جگە لەوەش رێنمایی پزیشکی کرداری پێشکەشى هاوڵاتیان کرا بۆ چۆنیەتى خۆپارێزی لە شەکرە، گۆڕینی شێوازی ژیان و پاراستنی تەندروستی گشتی.
لە بەشێکى دیکەى چالاکیەکەدا بە بەشداریی هەریەک لە سەنتەری د. رەند بۆ جوانکاری، کلینیکی کوین ئارت بۆ جوانکاری و کۆمپانیای جیڤاند، شیکارییەکی خۆڕایی پێستیان پێشکەش بەهاوڵاتیان کرد، لەگەڵ داشکاندن بەڕێژەى (٥٠%) لەسەر خزمەتگوزارییەکانی چاودێری پێست و گرنگیپێدانی کەسی بۆ بەشداربووانی چالاکییەکە.
ژمارەیەک لە فێرخوازانی بەشی بایۆمیدیکاڵ لە زانکۆی جیهان – هەولێر، ڕۆژى پێنچ شەممە ڕێکەوتى (٦/١١/٢٠٢٥)، بەشدارییان لە سەردانێکی ڕاهێنانیدا کرد بۆ پشتگیریکردنی منداڵانی تووشبوو بە ئۆتیزم لە سەنتەری ئۆتیزمی ئیماراتی لە هەولێر.
ئەم سەردانە بە سەرپەرشتی مامۆستاى یاریدەدەر هێرۆ ئیسماعیل محەمەد بەڕێوەچوو، بە گەیشتنیان، فێرخوازان لەلایەن بەشاران جومعە نادر بەڕێوەبەری سەنتەرەکە پێشوازییان لێکرا. پاشان لە دیدارێکدا ئامانجەکانی سەردانە ڕاهێنانەکە خرانەڕوو، لەگەڵ جەختکردنەوە لەسەر گرنگی پەیوەندی هێمن، ڕێزگرتن و پشتگیری دەروونی لە کاتی مامەڵەکردن لەگەڵ منداڵانی خاوەن سپێکتریۆمی ئۆتیزمدا.
دواتر فێرخوازان ڕێنمایی ڕاستەوخۆیان لە شارەزایان و چارەسەرکەرانی سەنتەرەکە وەرگرت، کە تێیدا بە پڕۆگرامە پەروەردەیی و ڕەفتارییە جێبەجێکراوەکان ئاشنا کران، هەروەک توانای دیاریکردنی پێداویستییەکانی هەر منداڵێک و شێوازەکانی مامەڵەی هەستیاری سەلامەت و گونجاو بۆ منداڵانی تووشبوو بە ئۆتیزمیان پێدرا.
لە بەشێکى دیکەى چالاکیەکەدا، فێرخوازان بە شێوەیەکی تاکەکەسی لەگەڵ منداڵەکاندا کۆبوونەوە، بە جۆرێک کە هەر منداڵێک لەگەڵ چارەسەرکەرێک یان سەرپەرشتیارێک بوو بۆ دڵنیابوون لە ئاسوودەیی دەروونی. فێرخوازان دیاری پەروەردەیی گونجاویان بۆ تەمەنی منداڵەکان پێشکەش کرد، کە بریتی بوو لە کتێبی ڕەنگکردن، قەڵەم، پازڵ و یارییە هەستیارییەکان. هەروەها بەشدارییان لە چالاکییە سادە و هێمنەکاندا کرد کە پێداویستییە هەستیارییەکانی منداڵەکانی ڕەچاو دەکرد.
لە کۆتاییدا بەشاران جومعە نادر سوپاس و پێزانینی خۆی دەربڕی بۆ بەشداری فێرخوازان و پابەندبوونیان بە فێربوونی شێوازە کاریگەرەکان لە پشتگیریکردنی منداڵانی خاوەن تێکچوونی سپێکتریۆمی ئۆتیزم.
ژمارەیەک لە فێرخوازانى قۆناغی سێیەمی بەشی بایۆمیدیکاڵ لە زانکۆی جیهان – هەولێر، ڕۆژی سێشەممە، ڕێکەوتى (٢١/١٠/٢٠٢٥) سەردانێکی هاندەرانەیان بۆ سەنتەری تالاسیمیا لە هەولێر ڕێکخست و چالاکیەکى مرۆییان ئەنجامدا.
چالاکیەکە بە سەرپەرشتی پڕۆفیسۆر دکتۆر میرزا حەمزە حەمادی بەڕێوەچوو، لە کاتی گەیشتنیاندا، فێرخوازان بە گەرمی لەلایەن محەمەد عەبدوڵڵا بندیان، بەڕێوەبەر و سەرپەرشتیاری سەنتەری تالاسیمیا لە هەولێر، پێشوازییان لێکرا، پاشان کورتەیەکى لەبارەى پەیامی سەنتەرەکە و ڕێکارەکانی پێشوازیکردن لە نەخۆشان و چۆنیەتى بەدواداچوون و ڕاپەڕاندنى کارەکانیان پێشکەش بە فێرخوازان کرد. لە ویستگەیەکى دیکەى سەردانەکەیاندا فێرخوازان بەشەکانى سەنتەرەکەیان بەسەرکردەوە و لەنزیکەوە چاویان بە ژمارەیەک لەو نەخۆشانە کەوت و گفتوگۆییان لەگەڵدا کردن و، پشتگیریی دەروونیان پێشکەش کرد، جگە لەوەش فێرخوازانى زانکۆى جیهان-هەولێر دیارییان پێشکەش بە نەخۆشەکان کرد و ئامۆژگاریی تەندروستییان لەبارەی گرنگیی خۆراکی تەندروست بۆ نەخۆشانی تالاسیمیا لەگەڵیاندا هاوبەش کرد، لەگەڵ جەختکردنەوە لەسەر پێویستیی دوورکەوتنەوە لەو خۆراکانەی کە ڕەنگە کاریگەریی خراپیان لەسەر ئاستی ئاسن و تەندروستیی خوێن هەبێت.
هەر لە چوارچێوەی هۆشیاریی تەندروستیدا، فێرخوازان مێوژی ڕەشیان بەسەر نەخۆشەکاندا دابەش کرد بۆ نیشاندانی بەهای خۆراکیی لەو جۆرە خۆراکانە، لە کۆتایی سەردانەکەدا، محەمەد عەبدوڵڵا سوپاسى فێرخوازانى کرد بۆ بەڕێوەبردنى ئەو دەستپێشخەرییە مرۆییە، هاوکات فێرخوازانیش سوپاسی ستافى کارگێڕی سەنتەرەکەیان کرد بۆ ڕەخساندنی ئەو دەرفەتە و بەشداریکردن لە پشتگیریکردنی نەخۆشان و بەرزکردنەوەی هۆشیاریی تەندروستی لە کۆمەڵگەدا.
